Os permisos recientment concedius a la mina de Borobia son os de captación d'auguas subterranias, o de vertius d'auguas residuals y o d'acceso a o dominio publico hidraulico, que ye o que permite plegar a una mayor profundidat. Dende diversas organizacions como Izquierda Unida, os concellos afectaus d'a cuenca d'o Manubles, a Plataforma en Esfensa de l'Augua y a Tierra y a Plataforma ¿Por qué no en Torrijo? S'ha advertiu contra os posibles efectos adversos que a nueva fase d'explotación podría tener.
Eduardo Sisamón, portavoz d'a Plataforma ¿Por qué no en Torrijo? ha explicau que son varias as afecciones que temen que traiga a nueva fase d'explotación. A primera sería a impermeabilización d'o río. A magnetita forma una capa impermeyable en o leito d'o río que impide que iste filtre o qual podría aumentar o risgo de riadas. O segundo problema sería que o tractamiento d'o mineral requiere d'una incineradora que produz azufre y iste podría estar arrocegau por o cierzo que bufa en a zona. A tercera afección sería que una vegada agotada a mina o suyo vaso (o forau resultant) sería replenau con augua d'o Manubles, o qual podría tardar seis anyos en os quals o río se quedaría sin caudal. En suma, como resultau d'istes procesos podrían causar-se grieus perchuicios a la flora y a fauna d'una zona de gran valor natural.
Sisamón tamién ha declarau que, amás de por a concesión, son muit disgustaus por o modo en el qual se ha levau a cabo. Sisamón ha acusau a la CHE de dar a noticia "con nocturnidat y alevosia" por "asperar a o estiu ta dar-la a conoixer, coseta que ya fació o estiu zaguero con o plazo de presentación de alegaciones". Amás, Sisamón ha denunciau que o feito solament yera desconoixiu t'a parte oposada a o prochecto porque "a interpresa teneba conoixencia dende fa mes y meyo d'a concesión".
Ta finalizar Sisamón ha pediu, encara que no tienga capacidat de decisión en o tema, una mayor implicación d'o Gubierno d'Aragón "que sía preventiva y no una vichilancia que certifique feitos consumaus". L'obchectivo ye privar acabar como o río Galligo con o Lindano, ha declarau. Dende a plataforma ¿Por qué no en Torrijo? afirman que manimenos d'os permisos continarán a suya actividat por meyo de concentracions debant d'a CHE y debant d'a mina, organizando chornadas cheolochicas ta visivilizar o tema y pedindo a o Gubierno d'Aragón que solicite bell tipo de protección legal t'o Manubles.
