ARREDOL | Los Brodies presentoron iste sabado en o bar El Zorro de Zaragoza, o suyo nuevo videoclip, en ista ocasión d’a canta Está en el aire, que da nombre a o suyo disco. A presentación se fació chusto antes d’un concierto a on que estioron rodiaus de buena cosa d’amigos y fans.
O videoclip ye rodau en chinero en a noria que se metió en a ribera de l’Ebro de Zaragoza dende as fiestas d’os Pilars. En o video, i apareixen muitas caras conoixidas d’o mundo d’a mosica como China chana, Dadá, The Bronson, Suizo de Jah’sta u Juako Malavirgen, entre muitos atros. Tamién i son atra vegada os socios de Ordio Minero, marca de biera artesana, qui ya apareixioron en o video d’a canta “Singing reggae all the time”, u a chent d’o Pub Posturas.
En o concierto i estioron muitos d’os participants en o video, que puyoron t’o scenario a cantar bella canta y a bailar con a banda. Como de cutio, Los Brodies tanyoron os temas d’o suyo primer disco y bellas versions como Echo de menos, de Kiko Rivera, u Mi gran noche de Raphael.
