VILAWEB / ARREDOL | Hue ye una d’as calendatas mas decisivas d’o proceso soberanista catalán. O pleno d’o parlamento ha aprebau finalment a lei de consultas populars, que será a base legal con que o president, Artur Mas, convocará a consulta d’o 9 de noviembre. A lei ha estau aprebada por 106 votos a favor y 28 en contra. A lei s’ha aprebau con os votos favorables de CiU, ERC, PSC, ICV-EUiA, as CUP y o diputau no adscrito Joan Ignasi Elena; solament o PP y Ciutadans se i han oposau. Ista lei ye l’aloix legal d’a convocatoria d’a consulta o 9-N. Os socialistas, con desavenencias internas, no i emparan.
O diputau de CiU Josep Rull ha defendiu que i hai marguin pa celebrar un referendum en Catalunya, y tamién pa aprebar ista lei de consultas, que desenrolla un articlo d’o Estatut que no estió ‘descabezau’ por a sentencia d’o Tribunal Constitucional. ‘Quan Rajoy diz ‘no puedo ni quiero’, de poder puede, pero no i hai voluntat politica’, s’ha queixau. Rull ha contrastau l’actitut de David Cameron con a d’o Estau espanyol, que ‘menaza con o miedo, con a suspensión de l’autonomía, que reune os fiscals a mesma semana que iste Parlamento fa un exercicio democratico’. ‘Cómo dengún puede charrar de seducción?’, ha ironizau.
Rull ha denunciau que o Estau ya no solament quiere privar o dreito a decidir, sino tamién ‘o dreito d’a sociedat catalana a expresar-se como una sociedat diferenciada’. ‘Isto ye que nos quieren prener y no nos deixaremos prener. No pediremos permiso ni pediremos perdón. Somos una nación que no aduerme en o pasau, sino en l’anhelo d’o futuro’, ha exclamau o diputau de CiU, que ha arreciau a voluntat d’os catalans de ‘construir o suyo futuro dende l’exercicio d’a libertat colectiva, a traviés de procedimientos pacificos y democraticos’. ‘Una immensa mayoría de catalans hemos decidiu que ha plegau a hora d’a democracia, a hora d’a libertat. Y por ixo somos y seremos imparables’, ha concluiu.
A diputada d’ERC Gemma Calvet ha defendiu a constitucionalidad d’a Lei de consultas, y ha recordau en iste sentiu o dictamen d’o Consello de Guarancias Estatutarias. ‘Si no s’escuita, no se veye, si no se veye, no se fa un servicio a la democracia y no se cumplen as leis. No cumplen vustés a Constitución si niegan a opción d’escuitar a ciudadanía’, ha advertiu a os partius contrarios a o 9-N.
Calvet ha remarcau que os politicos exichen a os ciudadans que cumplan a lei, deciden as suyas limitacions y mesmo si os servicios publicos cubren as suyas necesidatz. ‘Pero no los queremos escuitar?’, ha preguntau.
Dende ICV-EUiA, a portavoz parlamentaria, Dolors Camats, ha feito una endinada defensa d’a lei y d’a suya utilidat pa convocar a consulta d’o 9 de noviembre. Con ista norma, Camats creye que a consulta ‘ye o millor instrumento porque ye legalment posible, democraticament impecable, deseyable socialment, y, agora sí, politicament indispensable’. En iste sentiu, ha asegurau que as ‘guarancias que queremos’ pa lo 9-N son, precisament, ‘todas; todas as d’ista lei: os prencipios de pluralismo, neutralidat institucional, transparencia, no discriminación, u protección de datos’. ‘Ista ye a lei que queremos aprebar y a consulta que queremos pa lo día 9 de noviembre, por ixo votar ye a solución y no o problema’, ha adhibiu, concluindo que ‘a democracia sin libertat ye un simulacro, y no queremos simulacros; agora queremos votar’.
Camats tamién ha aprofitau pa negar que a consulta ‘se pueda substituir por garra atra cosa, ni por eleccions abanzadas, ni por movilizacions civicas’. A portavoz d’ICV-EUiA ha cargau tamién contra o PP y o gubierno espanyol por a suya actitut con a consulta y a suya ‘alerchia a la democracia’.
O diputau d’a CUP Quim Arrufat ha defendiu a lei como instrumento pa celebrar o 9-N, pero tamién como una norma ‘esencial’ pa ‘dar voz a os catalans’ y no deixar a politica ‘en mans de foscos tribunals u d’a politica enlatada’. Amás, ha considerau que fa honra pa sobrepasar a situación en que o Estau querría tener a os catalans. ‘En Escocia, urnias, debat y resultau. En o Estau y Catalunya, timbals de guerra, fiscalías de guardia, codigo penal y menazas’, ha criticau, alabando a norma que agora s’apreba por o que suposa pa los catalans.
‘Dende hue tenemos una lei de consultas populars. Chent, ye vuestra; defendetz-la y exercetz-la. Tendremos luego una convocatoria d’a consulta; celebremos-la y siamos fidels en o mandato democratico’, ha sentenciau Arrufat, tot vaticinado que d’ista traza, ‘o 9 de noviembre tendremos una consulta; o 9 de noviembre votaremos; o 9 de noviembre votaremos y ganaremos’. Quan isto pase, ha dito Arrufat, as CUP ‘queremos votar y queremos marchar’. ‘Marcharemos ta fer vía propia’, ha asegurau.
O PSC ha anunciau o suyo voto favorable a la lei, en considerar-la un ‘buen instrumento pa consultar a la ciudadanía respective a aquells afers que son dentro d’as competencias locals u autonomicas’. O diputau Ferran Pedret, ponente que ha defendiu a postura d’os socialistas, ha reiterau que iste emparo a la lei no suposa en garra caso un ‘aval’ a o 9-N, ‘ni muito menos’ a o proceso por o qual ista norma será a base sobre a que se convocará. ‘Y por qué avalamos a lei si ye l’instrumento pa convocar a consulta? Facil: porque no ye l’instrumento’, ha afirmau.
Y ye que os socialistas creyen que ‘si o president Mas convoca a consulta con a pregunta alcordada encadenada, o primer que ferá ye desconoixer a lei de consultas y o Estatuto d’autonomía’. ‘Si lo fa, seremos metendo en risgo o que consideramos un buen instrumento a o que podríanos dar un buen uso, un millor uso. Y isto lo saben a resta de ponents’, ha concluiu.
O diputau no adscrito, Joan Ignasi Elena, s’ha sumau a la mayoría y ha votau afirmativament a la proposición de lei. Pa Elena, a lei de consultas ye ‘o pistoletazo de salida d’a Catalunya que viene’, decidan o que decidan votar os ciudadanos o 9 de noviembre. ‘Os ciudadanos ya han decidiu que quieren una Catalunya mas chusta, mas limpia y mas democratica y con ista lei empecipiamos a construir un futuro con mas participación’. Seguntes Elena, ‘votar suma y une’, a diferencia d’os que opinan que ‘fractura y divide’ a sociedat.
Pa lo PPC, a lei de consultas ye feito ‘ad hoc’ pa lo 9-N y iste ye, precisament, o motivo por o que os populars s’han oposau a o prochecto. O portavoz adchunto d’o suyo grupo parlamentario, Santi Rodríguez, ha remarcau que ‘a independencia’ s’escapa d’as competencias d’a Generalitat y que, cómo ha sentenciau o TC, os catalans no son ‘soberanos’ pa decidir sobre ista qüestión.
Rodríguez ha lamentau o voto favorable d’o PSC, de qui no sabe si actúa ‘inchenuament’ u si fa de ‘gaire util’ pa os independentistas, y ha exclamau que o ‘no’ d’o PPC tamién ye ‘un ‘sí’ a la democracia, en o estau de dreito, a la convivencia, en Catalunya, en Espanya y en Europa’.
Pa lo president de C’s, Abert Rivera, iste 19 de setiembre no ye garra día de celebración, ‘ni pa os que s’alegran d’o ‘no’ en Escocia, ni pa os que creyen que a lei de consultas ye una buena noticia’. ‘Os estaus unius d’Europa son en chaque por os nacionalismos y os populismos. Os hemos de combatir en democracia y con un prochecto atractivo’, ha sentenciau. A crisi economica y politica d’Espanya y d’Europa ye o scenario ‘ideyal’ pa os partius independentistas.
Acabe habendo consulta u no pas, ‘o mal ya ye feito’, seguntes o lider de C’s. ‘A trencadura ya ye feita i haiga votación ilegal u no’, ha afirmau. ‘En una sociedat democratica a chent se puede autoetiquetar como socialdemocrata, liberal, democratacristiana, comunista, conservadora, cristiana, atea, musulmana, d’o Barça u d’o Madrit. Quan pretenden convertir una sociedat plural y ubierta en una sociedat en que yes con yo u contra yo, ye una gran irresponsabilidat’, ha concluiu.
A convocatoria d’o 9-N y a reacción d’a Moncloa
O momento exacto en que Mas sinyará o decreto de convocatoria ye incierto, pero o gubierno espanyol ya tien tot un dispositivo extraordinario presto pa impugnar decamín a o Tribunal Constitucional tanto a lei como o decreto. En parlan totz dos prencipals diarios espanyols, El Mundo y El País.
A previsión d’o gubierno catalán ye que Mas sinye a convocatoria d’a consulta malas que a lei haiga estau aprebada, antes que no o Tribunal Constitucional la suspenda cautelarment (que quiere dicir suspendida a totz os efectos dica que no i haiga un decisión firme d’o tribunal). Ista suspensión sería efectiva en que o gubierno espanyol fese plegar o recurso d’inconstitucionalidat y o tribunal l’hese admitiu a tramite.
A lei de consultas será vichent dende o momento en que salga publicada en o Diario Oficial d’a Generalitat (DOGC), y isto podría pasar maitín de tardes mesmo u o cabo de semana. Pareixe que Mas sinyará a convocatoria alavez.
Ya fa semanas y meses que o gubierno espanyol tien presto un dispositivo churidico pa responder decamín a la convocatoria, diz El Mundo. Y l’executivo de Rajoy ye presto pa una reunión extraordinaria d’o consello de ministros que se podría fer o sabado mesmo. Sería una reunión breu, tant solament pa impugnar a lei de consultas y o decreto de convocatoria. ‘Por os mas altos despachos d’a Moncloa han circulau quantos esbruixallos “extremadament elaboraus y minuciosos”, redactaus a o Ministerio de Chusticia y a l’advogacía d’o estau’, diz El Mundo, que adhibe que os textos definitivos se rematarán maitín en l’atardeixer, quan s’haiga feito publico o redactau definitivo d’a lei de consultas.
O gubierno espanyol, que habrá de requerir un informe d’o Consello d’Estau, pedirá o tramite d’urchencia reforzau, ye dicir, que haiga de pasar tant solament poco mas d’un día pa que sía rematau.
Si, efectivament, a consulta se convocase o cabo de semana y se fese iste consello de ministros extraordinario, o gubierno espanyol rechistraría o luns mesmo os recursos a o Tribunal Constitucional, que tien prevista una reunión o martes.
Tamién podría pasar que a convocatoria d’a consulta no se fese dica o luns u martes. En iste caso, seguntes El País, o gubierno espanyol podría igualment convocar un consello de ministros extraordinario a mitat de semana venient (os consellos de ministros ordinarios son o viernes de maitins). Sía como ise –seguntes El País–, a voluntat de l’executivo de Rajoy ye que o estau responda tant rapidament como sía posible a la convocatoria d’a consulta, pa que tienga una validez churidica de muit pocas horas u días.
A maquinaria churidica d’o estau espanyol s’ha enchegau. Y ahiere mesmo o fiscal cheneral d’o estau, Eduardo Torres-Dulce, se reunió con os fiscals de Catalunya pa analisar a respuesta que caldrá dar a una eventual desobediencia por parte d’o gubierno d’a Generalitat d’a prohibición de fer a consulta o 9 de noviembre.
