L’aumento d’o nivel d’o mar menaza o futuro d’os pueblos d’as islas d’o Pacifico y de l’Indico

ARREDOL | Mientres en Bonn se celebraba (d’o 4 a o 15 de chunio) una conferencia d’a Convención d’as Nacions Unidas sobre o Cambeo Climatico, Anoto Tong, president d’as islas Karibati, en l’ociano Pacifico, afirmaba que, seguntes as procheccions scientificas, pareixe inevitable a desaparición d’iste país baixo o mar. Tong apuntaba que, amás d’a mesma Kiribati, tamién as islas Marshall, Tuvalu y as Maldivas se troban en una situación similar: islas habitadas, dende sieglos, por pueblos autoctonos, que hue tienen os suyos estaus soberanos. Istas islas, d’una altitut muit baixa respective a o nivel d’o mar, se funden a causa …

Ciuidat de Malé, en as Islas Maldivas. Foto: Shahee Ilyas (CC-BY-SA)
Ciuidat de Malé, en as Islas Maldivas. Foto: Shahee Ilyas (CC-BY-SA)
Ciuidat de Malé, en as Islas Maldivas. Foto: Shahee Ilyas (CC-BY-SA)

ARREDOL | Mientres en Bonn se celebraba (d’o 4 a o 15 de chunio) una conferencia d’a Convención d’as Nacions Unidas sobre o Cambeo Climatico, Anoto Tong, president d’as islas Karibati, en l’ociano Pacifico, afirmaba que, seguntes as procheccions scientificas, pareixe inevitable a desaparición d’iste país baixo o mar. Tong apuntaba que, amás d’a mesma Kiribati, tamién as islas Marshall, Tuvalu y as Maldivas se troban en una situación similar: islas habitadas, dende sieglos, por pueblos autoctonos, que hue tienen os suyos estaus soberanos. Istas islas, d’una altitut muit baixa respective a o nivel d’o mar, se funden a causa d’a creixida d’as auguas provocada por o cambeo climatico. Un cambeo suscitau por a contaminación incontrolada que producen, mas que mas, os países d’o norte y atros en creiximiento, como China.

Ent’a crompa de tierras mas seguras

Os responsables politicos de Kiribati (que s’elevan uns tres metros sobre o nivel d’o mar) han crompau, a 2.000 kilometros de distancia, 20 kilometros quadraus de tierras d’a isla de Vanua Levu, en a Republica d’as Fidji. L’han feito pensando, de traza immediata, en a necesidat de guarenciar tierras de cautivo; pero a medio y largo plazo, temen que os suyos compatriotas (110.000 personas) se veigan obligaus a emigrar. Por agora, en o territorio crompau s’aplica un programa de producción agricola y piscicola.

As autoridatz d’as 1.100 islas que forman l’archipielago de Marshall pueden trobar-se entre as primeras apremiadas a seguir l’eixemplo d’as de Kiribati. As mas de 60.000 personas que forman a comunidat d’istas islas son atentas a os pronosticos pesimistas d’o suyo president, Christopher Loeak, seguntes o qual a desaparición de muitas islas será luego un feito y, en conseqüencia, a chent que agora habita s’ha de preparar ta fuyir-ne. A construcción de muros ta contener l’augua ye una opción, pero l’anyo pasau unas tronadas que engaronoron l’aeropuerto d’a capital, Majuro, blincoron a paret que ya i hai anclada en aquell punto, amostroron a dificultat d’ista solución.

Ixo que ye pasando en as Kiribati y as Marshall tamién l’experimentan atros lugars d’o entorno, que habitan en islas que que se van fendo chiquetas, con l’ascenso, por anyo, d’1,2 cm d’as auguas de l’Ociano Pacifico, seguntes datos d’o Programa d’as Nacions Unidas t’o Medio Ambient. En a mayoría de casos, siempre por falta de recursos economicos, no i hai traza de crompar tierras leixanas. A chent afectada empecipia a dar signos d’inquietut. Qualques gubiernos, como o de Nueva Zelanda u o d’as Fidji, han dito que son disposaus a acullir a qui haigan de fuyir d’as islas que se fundan. Pero no ye una qüestión que tienga una solución facil. O mes pasau, un tribunal neozelandés le negó a condición de “refuchiau climatico” a un hombre de Kiribati que viviba dende feba anyos en Nueva Zelanda. Entre os argumentos d’os chueces, a prevención que, si s’acceptaba o caso d’iste hombre, tot d’una i habría millons de personas en situación similar que podrían reclamar o dreito d’asilo. Y isto, evidentment, comportaría un problema de primer orden ta Nueva Zelanda.

No ye solament en o Pacifico que i hai problemas asinas. En o caso d’as Maldivas, conchunto de 1.200 islas (con una media d’altura de dos metros sobre o nivel d’o mar) situadas en l’Indico, os dirichents politicos han construiu barreras ta protecher as islas. Malé, a isla que alocha a capital habitada por unas 100.000 personas, ye de tot rodiada por un muro de contención. O gubierno, manimenos, no’n tien prous de diners ta construir un muro en cada isla. En atros o gubierno tien previsto concentrar toda a población y protecher-la con paretz si fa u no fa alteras, seguntes as necesidatz.

Una diversidat humana en periglo

A población de totz istos territorios constituye pueblos distintos con as suyas propias luengas. Habitadas dende fa sieglos en uns casos y milenios en atros, istas islas han sufriu a colonización de potencias occidentals (d’o Reino Uniu en o caso de Kiribati, Espanya y Alemanya en o de Marshall, y de Portugal y o Reino Uniu en o caso d’as Maldivas).

O lugar d’as Kiribati parla a luenga gilbertesa, que ye idioma oficial, de conchunta con l’anglés. O gilbertés ye una luenga d’o grupo micronesio, como muitas atras d’as charradas en o Pacifico, y a gran mayoría d’as suyas fablants se troban en Kiribati, tot y que tamién i hai en atros países d’a rechión, fruto d’emigracions recients.

Tamién d’orichen micronesio son os habitants de Marshall, republica independient dende 1986, quan se liberoron d’a tutela que exerceban os Estaus Unius. A luenga que charra a mayor parte d’a suya población ye o marshallés, parient d’o gilbertés. L’idioma marshallés solament ye emplegau en Marshall. Una chicota proporción d’habitants d’orichen norteamericano fan servir l’anglés.

As islas Maldivas, independients d’o Reino Uniu dende 1965, tienen una población d’orichens etnicos diversos, que charra o divehi, luenga d’orichen indoario y oficial d’o país. L’anglés ye muit usau t’o comercio y o turismo, y ye una luenga preferencial en a ensinyanza. O divehi, difuera d’as Maldivas, solament ye charrau en a vecina isla de Minicoy, perteneixent a la India.

O futuro de totz istos pueblos y d’as suyas luengas sería muit incierto si se perdesen os territorios an que s’han forchau y an que se mantienen vivos, quasi de traza exclusiva.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies