ARREDOL | Unatra anyada o Centro Rural Agrupau (CRA) Cinca-Cinqueta ha conseguiu estar present y que l’aragonés tamién en siga, en o Festival de Cine de Zaragoza. Concretament será en o II Certamen trobada d’escolars, que’n quedó finalista l’anyo pasau con o curto “La cursa del submarino”, feito por os ninos d’a escuela de Sant Chuan.
Esti anyo son tres os curtos en aragonés que i serán presents: “Adovina a qui se minchan esta nuet”, feito por a escuela de Bielsa, “La espluga asesina” d’a escuela d’A Espunya, y “Lugar de escaixalaus” d’a escuela de Saravillo. Os curtometraches se podrán viyer en o Festival de Cine de Zaragoza que se celebrará entre o 22 y o 30 de noviembre.
Os curtos son estaus menaus por o mayestro d’aragonés d’o centro, Javier Vispe, qui ha treballau con os guions feitos por os borches d’os lugars de Bielsa, Plan, Sant Chuan de Plan, Saravillo, A Espunya y Chistén, qui son tamién os protagonistas d’as historias que i recontan. Entre os 100 zagaletz y zagaletas d’istas escuelas, sisanta y seis estudean aragonés.
O prochecto de cine en aragonés ganó lo premio Paseo Project Mini, organizau por a Fundación Zaragoza Ciudad de Conocimiento y Ars Electronica y marchoron t’a ciudat de Linz, en Austria ta presentar-ie os suyos treballos en o festival Ars Electronica.
