ARREDOL | O Centro Aragonés de Barcelona quiere celebrar iste martes o 21 cabo d’anyo d’a creyación d’a Carta Europea d’as Luengas Minoritarias. Ta ixo, ferán un acto a on que se chuntarán tres luengas europeas en periglo: l’aragonés, l’asturiano y o sardo, luenga charrada en a isla de Cerdenya.
Dende as 20.00 horas se ferán lecturas de textos a on que participará Antón Castro por l’aragonés, Giacomo Floris por o sardo y Pablo Valenciano, por l’asturiano. En rematar se ferá una brenda y una sesión de mosica en aragonés a cargo de DJ Gurrión.
Dende o Centro Aragonés de Barcelona y l’asociación O Corrinche, remeran que a Carta Europea d’as Luengas Minoritarias ye un tractau europeo preso en Estrasburgo o 5 de noviembre de 1992 t’a esfensa y promoción de todas as luengas d’Europa que no tienen ran d’oficialidat, u que mesmo estando oficials en belún d’os firmants no’n son en atros, u que estando oficials, son en manifiesta febleza.
