Los concellos de L’Aínsa-Sobrarbe y Broto celebran “la presentación d'ofertas” pa la construcción de viviendas de alquiler publico, que dimpués d'a primera convocatoria realizada per parte d'o Gubierno d'Aragón en o mes de febrero heba quedau desierta. En a segunda convocatoria, que lo suyo plazo ha concluyiu este pasau martes, una empresa pa lo prochecto de L’Aínsa y tres pa lo de Broto han presentau ofierta.
En o caso de L’Aínsa lo presupuesto supera los 4.100.000 euros, con una subvención de fondos europeus que se sitúa en os 933.276 euros pa la construcción de 22 nuevas viviendas. En Broto, lo presupuesto ye de 1.258.000, con una subvención europea de 250.803 euros. En este caso lo prochecto consiste en a rehabilitación de l'antigo cuartel d'a Guardia Civil. Allí son previstas nueu viviendas d'una y dos cambras. En toz dos casos los concellos rebloron las aduyas europeas a lo Gubierno d'Aragón, igual que la parcela y lo inmueble de titularidat publica.
La noticia ha estau recibida “con goyo” tanto per parte d'Enrique Pueyo como per Carmen Muro, alcalde y alcaldesa de L’Aínsa y Broto respectivament “perque hemos luitau muito pa aconseguir estes fondos. D'esta traza, podremos dar facilidat pa emanciparse a los chóvens d'os nuestros lugars y permitir l'asentamiento de personas que vienen a treballar y que quieren establir-se aquí”, aseguran.
“Serán viviendas de alquiler a pres asequibles”
En a primera convocatoria las empresas troboron dificultaz pa plantiar ofertas “y prou que sí nos alivia que finalment haigan llegau. Somos conscients que estas viviendas no solucionarán lo problema que actualment tenemos, pero ye una fase inicial que nos aduyará a abanzar en a millora d'oportunidaz en Sobrarbe”, asevera Pueyo.
“Que finalment toz dos prochectos puedan levar-se a cabo permite igualment que no perdamos lo financiamiento europeu que tanto nos heba costau conseguir. Los presupuestos municipals son chicoz y estes prochectos tan ambiciosos nomás son posibles d'executar con o compromiso d'administracions superiors”, concluye.
