La menstruacion d'o caviar

Ixe momento en que te baixa la regla puede arribar a estar un verdadero alívio. Qué paz pa la que no quiere estar mai, u no en ixe momento. Qué bonico seria se amés no venís acompanyada de moléstias que pueden doblar-te como un muelle, dolors que s'extienden dica la punta d'as extremidaz, u ixas ganas de bosar que feva...

Creative Commons CC0

Ixe momento en que te baixa la regla puede arribar a estar un verdadero alívio. Qué paz pa la que no quiere estar mai, u no en ixe momento. Qué bonico seria se amés no venís acompanyada de moléstias que pueden doblar-te como un muelle, dolors que s'extienden dica la punta d'as extremidaz, u ixas ganas de bosar que feva tanto que no sentivas. Podemos parlar-ne con la leugereça que las nuestras abuelas no comtemploron, e una normalidat que a las nuestras mais lis costó d'imaginar. A lo Estau Espanyol puez alcontrar tampax e compresas on sia; qualquier farmácia, supermercau u botiga de "tiengodetot". Au, que se a continuacion a este articlo vien un grito feminista, fa ganas de decir que nos queixamos de vício.

La menstruacion ye un proceso fisiologico qu'afecta a la metat d'a poblacion mes sin altro entre dos e siet dias. Dende Eva, ya podeva la sociedat haver avançau un poco més rapedo en desterrar tabús, pero tamien en tratar-lo con més naturalidat que no un esguince de clavillero. La qüestion ye que no ye pas prioridat sanitária, pero salvo una part d'as mullers trans, a la de demés no nos ne queda d'altra que tener-la. E, qué tienen es tampax, compresas e copas a lo Estau espanyol? Lo mesmo IVA que lo caviar, la importacion d'objetos d'arte, antiguidaz e objetos de coleccion u las flors. Podria estar pior: sobre toz estes productos, s'hi aplica ya una tasa d'IVA reducita que suposa lo 10%. Qué altras tasas d'IVA s'aplica? La "general", d'un 21% que grava l'alcohol u lo tabaco, e la "superreducita", cargata con lo 4%. E direz, se es tampax no dentran en l'IVA d'o 4% qué lo fa? Pus es productos que lo Estau considera de primer necesidat como lo pan, lacteos u fruitas e verduras; prensa que no contienga fundamentalment publicidat, libros, partituras u mapas e vehiclos a motor u protesis pa personas con diversidat funcional, entre altros biens e servícios.

Altros productos pa tratar lo vício que tenemos con la menstruacion tamien son pa una pocas privilegiatas. Lo naproxeno sodico més utilizau pa tratar es dolors derivaus d'ella costan 4,72€ la caixa de 40 comprimius, que sigue estando muito més asequible que no las blancas pastillas arretunas tan venditas en es noventa: 7,10€ per 10 comprimius. Se per motivos de salut no te recomiendan prener anticonceptivos orals, pero has de tratar-te per desarreglos hormonals: aforra germana, perque l'anillo vaginal més recomendau e vendiu con una durada d'un mes, costa la calderilla de 19,92€. La enajenacion feminista de querer utilizar-lo como metodo anticonceptivo, pa l'altro articlo. Dica alavez gritaremos que Canadá, Canárias u Kénia no aplican -u aplicaran proximament- ni lo 21% ni lo 4%: han eliminau la talla androcentrica.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies