ARREDOL | La Gran Orquesta Republicana torna ta Zaragoza huei viernes 25 con a suya “Chira chicota 2013″. O concierto será en a Sala López a partir d’as 21.00 horas y en formato achiquiu, con batería, baixo, guitarra, voz y trombón nomás.
A colla balear ferán un repaso d’a suya discografía y antimás ferán belunas d’as cantas que serán en o suyo nuevo disco “Capitalismo KO”. Iste será o nuevo treballo dimpués de “Abrazos”, que facioron en 2004, encara que sí que han feito tant y mientres bella canta nueva, versions u a edición d’un DVD en directo.
A colla chunta mosicas como rock, ska, reggae u mesmo punk. As suyas letras son siempre reivindicativas con un estilo propio y versionando a soben textos de autors latinoamericanos como Eduardo Galeano u Mario Benedetti.
