ARREDOL | A colla parlamentaria de Izquierda Unida (IU) rechistró ahiere una moción a on que demanda a lo Gubierno d’Aragón que s’ubra una comisión d’investigación sobre a chestión d’a CAI en as zaguers anyadas y a que se cese a o suyo antigo director cheneral que agora ye Conseller Delegau de Caja3.
En a moción, o partiu “manifiesta o suyo refirme y solidaridat con os treballadors y treballadoras d’a CAI, integrada agora en Caja3, y claman a lo gubierno a meyar en o nuevo proceso de negociación colectiva con l’obchetivo de que no se forachite a dengún y que se mantienga l’actual plantilla”.
Proposan tamién a creyación d’una comisión d’investigación sobre a caixa aragonesa a on que “s’estudien, analisen, investiguen y demanden responsabilidatz por a imprudent chestión d’a CAI dende l’anyada 2000.” Demandan, tamién, que se cese a l’actual Conseller Delegau de Caja3 y anteior Director cheneral d’a CAI por lo que consideran “una chestión periglosa y perchudicial t’os intreses d’a Comunidat d’Aragón” y por “enganyar a los treballadors, sometendo a toda la plantilla a sinyar un ERE baixo a presión de sinyar un alcuerdo antis d’o 15 d’aviento ta poder tener o Visto Bueno y as aduyas d’a Unión Europea, blincando-se os alcuerdos que se i heba plegau y sinyau en o convenio colectivo d’o sector”.
