ARREDOL | Industrias Monzón XXI se ferá cargo en Calatayut d’a planta que yera propiedat d’a interpresa Kimberly Clark, que trancó en mayo, deixando a 208 personas sin treballo. Industrias Monzón XXI ha estau a unica interpresa que ha compliu con todas as condicions d’o concurso publico d’o concello de Calatayut.
Ista companyía invertirá una cifra de 5.250.000 euros, fundamentalment pa maquinaria y adequación d’as instalacions, y ye previsto que creye 53 puestos de treballo y ye previsto que empecipie a funcionar en o cabo d’iste anyo. O venient diya 26 recibirá o visto bueno d’o concello calatayubí.
A interpresa pagará una cifra de 100.000 euros anyals a o concello de Calatayut en concepto de loguer d’a planta, encara que podría bonificar-se ista cantidat total. Os terrenos se cederán a la interpresa por cinco anyos renovables por atros cinco.
Industrias Monzón XXI fabrica tablers contrachapaus de fusta de chopo pa diversos components d’o sector industrial u d’o mueble. A interpresa cuenta con una planta en Ateca y pretende d’ixamplar a suya producción pa fer nuevos productos en Calatayut.
