ARREDOL | Dimpués d’a buena acullida que tenió a primer edición, o perfil de Facebook L’Aragonés en a Plana de Uesca organiza o II Concurso de Haikus en Aragonés, que ye ubierto dende fa bells días en iste ret social.
O haiku ye un tipo de poesía chaponesa, que consiste en un poema breu, por un regular formau por tres versos de cinco, siet y cinco silabas respectivament. A poetica d’o haiku se basa a sobén en a sorpresa y o goyo que siente o poeta en alufrar a naturaleza, pero as tematicas pueden estar variadas.
Se puede participar en o concurso escribindo totz os haikus que se quiera en a pachina d’o evento en facebook, con a sola condición que han d’estar escritos en aragonés. O concurso se zarrará l’11 d’abril.. Se premiará a o haiku mas popular, seguntes o numero de “me fa goyo” que haiga recebiu o haiku, y un premio a o millor haiku, atorgau por un churau. Os premios serán libros donaus por as entidatz colaboraderas: Xordica Editorial, Gara d’Edizions, Instituto de Estudios Altoaragoneses y Consello D’a Fabla Aragonesa.
