Las Fiestas de Sant Lorient d'este 2024 “contan con importants novedaz, s'ha treballau en a imachen de marca d'as fiestas, una imachen que servirá pa engalanar la ciudat y vestir-la d'o blanco y verde que identifica a las fiestas de Uesca. Novedaz tamién son los inflables refrigerados que, atendendo a las temperaturas, s'ha visto adecuau adaptar-los. Este anyo se situarán en o vico Santo Domingo y Santo Martin y la Encarnación los días 12 y 15 d'agosto. Tamién se cubrirá lo escenario d'a plaza López Allué, pa privar suspensions per inclemencias meteorolochicas tal como succedió l'anyo pasau. Y s'amplia la programación en General Alsina os días 13 y 14, y tamién se recupera lo circo en a seu de Santa María los días 13 y 14”, destacaba como ‘grans’ novedaz la concejala de fiestas de l'equipo d'o PP, Nuria Mur, en a presentación oficial d'as fiestas -programación oficial d'as Fiestas de Sant Lorient 2024-.
La ciudat occitana de Tarbes, achirmanada con l'aragonesa Uesca dende 1964, será qui recibirá la Parrilla d'Oro d'a ciudat con motivo d'o 60 aniversario de l'achirmanamiento. Y “per unatro costau, atendendo a la gran demanda popular, Alegría Blan, propietaria d'a Tabierna Brasil chunto a Álvaro Gracia dende fa 51 anyos, será qui lanzará lo cohete anunciador d'as fiestas lo proximo día 9 d'agosto”, sinyalan dende lo Concello de Uesca. Tot ixo, seguntes o pareixer de Mur “ye disenyau pa toz los publicos, achugando per un esprito laurentino, per la nuestra historia, per lo espectáculo y per la diversión”, pero lo relucir d'a propaganda no ilumina toz los rincones foscos de las demandas populars de participación.
Lo PSOE lamenta que Uesca pierda “lo suyo tradicional aroma a albaca” entre las fiestas de Sant Lorient: “Lo prencipal cambio de l'equipo de Orduna”
Lo Grupo municipal socialista considera “decepcionant que los grans cambios que anunció Lorena Orduna pa las fiestas de Sant Lorient se reduzcan a acabar con una de nuestras señas d'identidat: l'equipo de gubierno ha decidiu no engalanar las prencipals carreras d'a nuestra ciudat con albaca”.
Roberto Cacho, concejal d'o PSOE, preguntó a lo respecto en a comisión de medio ambient “y la respuesta ha estau que este anyo no se contempla, per lo que los oscenses ni veyerán ni ferán olor d’os maceteros y torres d'albaca que tradicionalment s'instalaban per lo centro y en o parque Miguel Servet”. Per lo que pide “que recapaciten. Uesca no puede perder lo suyo tradicional y inconfundible aroma entre ixes días”.
En o PSOE oscense asperaban “grans anuncios pa este primer Sant Lorient organizau per Lorena Orduna -PP-. Pero de dentrada los oscenses s'han quedau sin albaca y sin prelaurentis. Dos minimos a la par que grieus cambios en un programa de fiestas que contina ofrindo los mesmos actos y actividaz que en os zaguers anyos”.
Pa Cacho, “lo modelo de fiestas d'os zaguers anyos no ha d'estar tan malo como lo Partiu Popular deciba pues l'han manteniu practicament en a suya totalidat, ixe gran cambio que anunciaban pa las fiestas de Sant Lorient, tan poco ha plegau. Y recuerda que fa un anyo, “la propia alcaldesa charró de muitas y novedosas ideyas, de recuperar actos tradicionals y de fer ‘bella cosa bonica’. Una vegada mas, tot se queda en un titular y muitas promesas que s'han traduciu en poco mas que un lichero maquillaje en o programa laurentino”.
CHA Uesca asegura que lo programa d'as Fiestas de Sant Lorient ye un “corta-pega d'anteriors edicions”
Pa Sonia Alastruey coordinadera de CHA Uesca, ”sin conciertos en prelaurentis, con un programa que torna a estar un corta-pega de l'anterior, an no se veye per garra costau garra aportación novedosa de l'actual equipo de gubierno, sin participación ciudadana pa la elaboración d'o programa y la confección d'o cartel, Sant Lorient 2024 será un exito perque una vegada mas las y los oscenses contrimostrarán de forma aclapadora que ye emplir las carreras y vivir-las intensament”
En o balanz “d'o Sant Lorient 2023 le recomendábanos a l'alcaldesa Orduna, fuyir de l'autocomplacencia, contando con as Penyas y demás colectivos en as fiestas dende lo primer momento en que se prencipia a elaborar lo programa festivo pa conoixer las suyas propuestas y opinions y y incorporar aportacions, fuyindo d'o corta-pega, achugando per un cartel de conciertos importants en prelaurentis y mantenendo ixe nivel pa la semana gran, empecipiando per empentar la participación como yera tradicional en a elaboración d'o cartel de fiestas, y que los programas estasen bilingües castellán/aragonés”, recalcan dende CHA.
Manimenos, Alastruey destaca que “cosa d'ixo s'ha levau a cabo, no desfrutamos de conciertos en prelaurentis, lo programa torna a estar un corta-pega de l'anterior, an no se veye per garra costau garra propuesta novedosa que empente las fiestas d'a segunda ciudat d'Aragón y capital de l'Alto Aragón, an la confección d'o cartel estió per medio d'encargo y los programas serán exclusivament en castellán”.
“Tornamos a insistir que ye fundamental contar con o caudal humán y d'ilusión que represientan las Penyas Recreativas, establindo un dialogo contino con ellas con l'obchecto d'ofrir un programa de ocio entre tot l'anyo especialment endrezau pa lo publico adolescente y choven”, incide Alastruey.
Per unatra parte, dende CHA sinyalan que “ye necesario empentar lo espacio d'os chiringuitos, an ye evident que falta variedat pa fer-lo mas atractivo, y per ixo consideramos que debe complementar-se con un espacio que reflecte con amplitut l'artesanía aragonesa pa meter en valor tot lo que producen artesans y artesanas de tot lo país”.
“Resulta actualment imprescindible adecuar lo programa, los horarios y los espacios a las cada vegada mas frecuents temperaturas elevadismas, pa que sía mas suportable la participación en os diferents actos, en ixa linia cubrir l'important escenario d'a Plaza d'o Mercau debería estar una prioridat, per un costau pa que no se deban suspender las actuacions en caso de tronada, y per unatro pa facilitar actuacions como las d'os Danzantes y la Banda de Mosica en o maitín d'o día 11, qui deben estar trataus con mimo en tot momento debant d'o esfuerzo que realizan entre tota la semana de fiestas”, detallan.
“Tot y con a falta de nuevas ideyas y de plan pa empentar las nuestras fiestas, somos seguros que las y los oscenses contrimostrarán de forma aclapadora que ye emplir las carreras y vivir intensament las fiestas de Sant Lorient, dende lo prencipio con Alegría -somardeaba Alastruey pa concluyir-”.