Fernández Díaz embrecau en una conspiración pa fabricar escandalos contra ERC y CDC

O escandalo esclata en plena campanya electoral. A oposición pide a dimisión d'o ministro y que Rajoy aclare si conoixeba o no istas conversacions

Jorge Fernández Díaz.

Unas gravacions de l’anyo 2014, publicadas por o diario Público entre o ministro de l’Interior espanyol en funcions, Jorge Fernández Díaz y o chefe d’a Oficina Antifraude Catalana, Daniel de Alfonso, podrían demostrar a suya implicación en un presunto complot contra liders independentistas catalans.

En as converacions entre os dos cargos, poco antes d’o referendum d’o 9N catalán, se prebaba de fabricar falsos escandalos contra os partius politicos catalans ERC y CDC y mesmo acusar-los de prevaricación. Totz dos han reconoixiu que istas conversacions fuoron en o Ministerio de l’Interior, pero s’acusan entre ells sobre quí realizó a gravación.

O ministro en funcions y candidato d’o PP por Barcelona en as eleccions, Jorge Fernández Díaz, ha declarau sentir-se “a victima d’iste atropello” y considera que o que ha trascendiu d’as conversacions ye “quitau de contexto“. Amás ha demandau investigar quí gravó as conversacions.

Fernández Díaz ha comentau que o president d’o Gubierno en funcions, Mariano Rajoy, desconoixeba iste asunto, como asinas l’ha confirmau o propio president, encara que en as gravacions Fernández Díaz asegura que Rajoy sí lo sabe.

Os prencipals liders d’a oposición, Pedro Sánchez (PSOE), Pablo Iglesias (Podemos) y Albert Rivera (Ciudadanos) han demandau a dimisión decamín de Jorge Fernández Díaz y l’aclaración a Mariano Rajoy sobre si realment desconoixeba u no iste asunto. Os prencipals afectaus, CDC y ERC tamién demandan a dimisión d’o ministro y mesmo de Mariano Rajoy.

Tanimientres, a mesa d’o Parlament catalán, ha iniciau o proceso pa destutuir a Daniel de Alfonso d’o suyo puesto de director d’a Oficina Antifraude Catalana (OAC). Daniel de Alfonso critica o procedimiento pa destituir-le en considerar que s’amenista una causa legal.

[alaya_toggle status="open" title=""]Noticia de Arredol.[/alaya_toggle]

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies