ARREDOL | Ordio Minero leva bell par d’anyos portiando la suya biera artesana por tot Aragón y dillá d’as nuestras mugas. L’aragonés ye un d¡os sinyals d’identidat d’a interpresa. Atro d’ells, tener a siede en o chicot lugar teruelano de Blesa. Charramos con Chesús, un d’os dos socios que menan Ordio Minero
¿Qué ye Ordio Minero? ¿Quals son os prencipios d’a vuestra fabricación?
Ordio Minero no ye que una interpresa de dos barrenaus que querebanos estar en o lugar y fer bella cosa que tenesenos d’afición y que pensabanos que podebanos vivir d’ella. Ya febanos bieras en casa y un diya nos decidiemos a montar la interpresa. Estiemos dos anyetz alto u baixo parando lo que ye la interpresa dica que a la fin vamos prencipiar con o prochecto en l’anyo 2012.
¿Cómo han estau istas dos anyadas?
Bien, encara que Aragón ye un país prou complicau. Lo primer, porque no somos valients nusatros a l’hora d’emprender. Nusatros estiemos muito valients, u muito barrenaus, en o nuestro prochecto.
Prencipiemos en o mercau con una biera negra. En todas las nuestras comunicacions, pachina web y demás femos servir l’aragonés como atra luenga de comunicación y adintro d’a interpresa l’aragonés ye a luenga que femos servir tamién.
Asinas que: una biera negra, tot en aragonés, Ordio minero,… tot lo mundo deciba que Aragón iban a estar os primers en refusar-nos y hemos puesto viyer que ye de revés. Que ixas ganas de reivindicar a identidat aragonesa, tanto la cultura, como en a luenga, como en o patrimonio industrial d’a cuenca menera, no nomás no s’ha refusau sino que a la chent l’ha cuacau que emplegemos l’aragonés y que reivindiquemos l’aragonés en o nuestro prochecto. Siempre bi ha bell trastucau, pero a la sociedat normal l’ha feito goyo.
¿Cómo viyetz o panorama d’a biera artesana en Aragón agora que pareixe que se son metendo de moda?
A biera artesana ye prou complicada porque en l’equilibrio entre a pervivencia y creixer, tiens que te deixen vivir u que no te deixen vivir. Si devantas a voz una miqueta pareixe que no pasa cosa. Si la devantas guaire, tenemos grans grupos de biera, y más en ista tierra, que son fendo os posibles porque no la devantes.
Alavez cal treballar muito y fer pachas con toda la chent que tenemos a o canto. Con todas as interpresas agroalimentarias que somos luitando porque nos deixen o nuestro cadico ta poder vender y ta poder vivir.
Y que l’adminsitración no nos toque masiau os collons. Porque cal parar cuenta que l’administración te demanda los mesmos permisos que a una interpresa con un gabinete que s’adedica nomás que a manullar tot lo que son os requisitos administrativos. Os que somos chicorrons no tenemos atra que fer-lo tot nusatros con lo que o diya que lo pierdes en papels, no fas treballo.
Agora fetz un festival en Blesa…
Isto naixió l’anyo pasau t’agradeixer a lo lugar y a la comarca tot lo refirme que nos heban dau. Somos chent d’o lugar y ixo tien cosas buenas y malas. Bueno ye que quan prencipias tot lo mundo t’aduya. A mala ye que quan prencipias a funcionar tot lo mundo te “machaca”. Iste anyo queremos fer-le iste regalo a lo lugar por o suyo refirme y empentón.
Os conciertos los femos sin aduyas de l’administración. Ye tot autochestionau como tot lo que femos. Si o nuestro programa ye comunitario en ye de prencipio t’a fin.
Iste anyo, lo festival lo prencipiaremos con Bog, que ye una colleta que fa dub reggae, que a metat son vecins de Belchit. Continaremos con Los Jaques de la Sierra, que son unos mozos de Calamocha que fan narco-corridos de historias aragonesas. Más que más, d’a parte de Calamocha, pero yo tamién sé que bella historia de Blesa tienen en o disco. Dimpués plegará dende Escuita a colla Ni Zorra, que son uns mozos que han empentau prou fuerte iste estiu y que yo les veigo buen futuro, porque lo fan muito bien y se son “metiendo canya”. Nos divertirán prou. Antimás ye rock minero, que ye lo que cal. Nos cantarán Santa Bárbara y ixas cosetas.
Dimpués bi habrá un cambio en o concierto, porque baixarán d’os monts y d’a sierra a companyía Almugavar Ixera que baixarán ta Blesa a recullir-ie l’esprito almugavar que les cal ta marchar ta tierras turcas y t’as cruzadas. Ye claro que les cal bell hordio, asinas que hemos feito unas bieras conmemorativas de Ixera, que son as que levarán en a suya companyía almugavar por todas as tierras a on que faigan conciertos.
A nueit rematará con The Faith Keepers, que son una colla muito fuerte agora, con una calidat sobrebuena y uns directos espectaculars, que estoi que será ya una gran final t’o festival.
A ideya ye de prencipiar a las seis d’a tarde y remate sobre as tres, pero conoixendo lo alicates que son os d’as collas, puet pasar qualsiquier cosa. Prou que bi habrá zona d’acampada de baldes. Tendremos entrepans calients y tamién un gran sorteyo que o premio será un cabo de semana en a casa rural de Blesa con una tarde de taste de bieras en a fabrica de Ordio Minero y un domingo con dos entradas ta ir t’o museu minero d’Escuita
