Enerchía de vacío

Aragón ye lo paradigma d'a colonización interior, ye una colonia fractal, la macrocefalia d'a capital se reproduce en diferente escala a lo largo y amplo d'o país

L'universo s'expande de forma accelerada. Sí, ixo afirman os fisicos fendo uso de datos, no pas d'especulacions. O vacío chenera espacio. Sí, no me clametz loco, estando fisico nomás intuyo lo que puede significar esto, pero lo vacío ye fértil.

En fa ya 14 anyos que me’n torné ta o lugar de mis pais, sí, me’n torné, encara que siga naixiu de Zaragoza, pero, como siempre he dito, o mío chenoma, a mía chent ye de Moncayo. A información chenetica y la cultural en salió pa tornar-ie.

Por suerte me vivo en una redolada con población suficient y con un nuclio urbano-rural que sostiene, en precario, una dinamica acceptable, pero las dinamicas profundas reproducen as problematicas de comarcas mas deprimidas d'o nuestro país.

Aragón ye lo paradigma d'a colonización interior, ye una colonia fractal, la macrocefalia d'a capital se reproduce en diferente escala a lo largo y amplo d'o país. En a mía comarca, Tarazona, a capital, ha bombiau personas enta otras capitals, ha ixugau lo suco d'os lugars pa catapultar a los suyos ciudadanos enta Zaragoza, en o millor d'os casos, si no ta Bilbau u mas modernament ta Madrit. Puro extractivismo de personas. A enerchía que ha moviu esta bomba extractiva ye estau lo capitalismo, cumulo d'os piors defectos humanos, alimentau de vez por l'exceso enerchetico que los combustibles fósils nos han atorgau en estos dos zaguers sieglos.

Pero tot esto s'ha acabau. Lo sé dende que prencipié a aprender termodinamica (1995), a enerchía ye finita y o suyo uso se degrada implacablement. Mesmo d'antes, talment tienga cierta capacidat natural pa entender los patrons fisicos, ya veyeba que bella cosa no cubicaba.

En 1989 veyié con 14 anyos cómo espaldaban lo muro de Berlín, un entusiasmo popular esclató en Europa, y yo en facié parte, pero luego observé que no yera oro tot lo que reluciba. Ya ta part d'alavez sabeba que lo camino sin limites d'o capitalismo no acabaría bien. Y en estos zaguers 30 anyos, la inflación creixentista d'o sistema consumista ha feito que haigamos plegau a lo maximo en producción enerchetica, a lo maximo en producción de minerals esencials pa la tecnolochía moderna, y no lo digo yo, lo dicen muitos scientificos que no tienen obchectivos interesaus, como Antonio Turiel, vos recomiendo leyer-lo y escuitar-lo, mesmo tenetz la suerte d'escuitar-lo en catalán, ya que ell ye naixiu de León y se vive en Figueras.

Nos fa goyo d'escuitar a la sciencia ubrir-nos buegas, prometer-nos milloras eternas, pero quando nos amuestra los limites infranquiables, las mugas inviolables, alavez nos encarranyamos como un nino chicot. Lo siento, como digo en as mías clases, lo siento, esto no ye una democracia. Ye loca esta idea pero cada vegada le trobo mas sentiu.

Socialistas d'o mundo, no nos cal una dictadura d'o proletariau, nos cal una dictadura d'a sciencia, porque a sciencia, que no pas a tecnolochía, ye lo profesor que navega una clase, lo pai que cría un fillo, la mai que en ye un referente. Y agora, cada vegada con mas insistencia, con mas retundidat, os scientificos nos dicen que nos hemos d'apegar a la tierra, a los suyos ritmos, a los suyos recursos renovables, nos hemos de mimetizar con o suyo funcionamiento organico. Y no vengatz con barucas de new age, no pas, soi charrando de sciencia. Ecolochía u barbarie, socialismo u barbarie, feminismo u barbarie, soberanía u barbarie, sciencia… u barbarie.

Y tornamos ta o vacío, ta l'Aragón laso, ta la Europa espoblada, ta lo mundo foradau. Ixe espacio rural que s'ha ixugau, que nomás en queda lo baste que albardau por una immigración, diversa, despreciada y necesaria, estrania pero definitoria, ye lo vacío creador. Necesitamos ixe espacio vuedo como especie, necesitamos qui lo plene pa fer-lo creativo, creador, usuario d'una naturaleza que la evolución nos ha dau en usufructo. Será duro, pero debe ser.

Y cómo puede estar? Pos metamos d'eixemplos. O movimiento actual de refús a las grans explotacions extractivas d'enerchías ye una expresión de voluntat sobirana, no queremos que engaronen lo nuestro país de cataticos que nos furten la enerchía y hipoteque lo territorio pa que un otro en saque beneficio purament economico, un otro que no ye soque un acumulador de capital, asinas que no ye nomás que una demanda de sobiranía sino tamién de democracia economica, socialismo y sobiranismo en esencia. Preparemos pues lo futuro aproveitando los recursos en local y que lo podamos fer de forma comunitaria, se leiga comunidatz enercheticas, se leiga reforestación pa cheneración de biomasa sostenible, se leiga como se quiera, pero sobiranía, socialismo u barbarie.

No ye fácil, nos falta inercia, nos falta capital, pero nos cal, nos cal lo cooperativismo, lo enerchetico, lo financiero, lo alimenticio. Hemos de crear, ya, la alternativa a la agroindustria alazetada en os combustibles fosils, por lo transporte, por los abonos de sintesi, por la maquinaria agricola… cal crear un ret de retz que nos dé de minchar sobre los pilars d'a tierra, d'a propiedat comunal, d'a sobiranía alimentaria a la finitiva. A solidaridat internacionalista la necesitamos, lo cooperativismo local tamién, pero nos lo han muerto en as nuestras mans, debant d'os nuestros uellos en este esnavesar por lo desierto, dende que lo stalinismo afogó la revolución d'o Consello d'Aragón, y lo capitalismo trunfó dimpués d'una guerra de 50 anyos, rusient y fría.

Pero no nos enganyemos lo hemos de fer contando con a realidat de tecnooptimistas, de creyents en o beneficio d'o creiximiento capitalista y de creyents en espritos sanadors, porque esta ye, nos faga goyo u no pas, a nuestra chent, y d'esto, en somos perfectament conscients los que queremos vivir en este vacío existencial, un vacío creador.


Articlo publicau orichinalment en Lagor.info

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies