Ahiere, mirando per dencima los titulars de prensa, una noticia clamó la mía atención:
Salvatore Garau ye un artista plastico de 67 anyos, sardo, que acaba de vender una obra invisible per 15.000 euros. Beluns lo consideran un chenio que ha sabiu vender lo vuedo, encara que pa ell la obra immaterial titulada "Io sono" existe en a suya mente. Pa chustificar-lo recorre a la filosofía y a la existencia de dios: "Lo vuedo no ye mas que un espacio pleno d'enerchía y, mesmo, si lo vuedamos, seguntes lo prencipio d'incertidumbre de Heisenberg, lo vuedo tiene un peso.
Per tanto, tiene una enerchía que se condensa y se transforma en buscas, que son en nusatros. A fin de cuentas, no damos forma a un dios que nunca hemos visto?
Asinas que yera ixo. Yo, tot este tiempo convenciu que l'emplir concellos, casas reals, deputacions y demás pitanyars, d'antropoides escelebraus yera un recurso de prevención debant de la menaza futura d'un apocalís zombi, y resulta que no. Resulta que ixas testas vuedas son expositors d'obras d'arte... Agora l'entiendo, yo siempre imachinando, en a mía innocencia de Dragón, que yera una estucia pa aconseguir vencer a los no-muertos per inanición y no, en realidat yera bella cosa muito millor y, amás, de profeito. Coseta la quala tamién ye d'agradeixer, que sirvan pa bella cosa, no
como dica agora.
Gracias pus Don Salvatore, ye vusté lo mío heroe; dito esto, ferá falta meter nombres pa los expositors que auespan ixes vuedos enercheticos en a ciudat prisión an sobrevivo, Zaragoza. U, mesmo, pa la Comunidat d'Esclaus que la auespeda... no, no cayeré en topicos facilons como clamar bella obra "Democracia", u "Vergüenya"; u mesmo "Honestidat". Pero sí que daría lo premio a lo mayor vuedo, no voi a decir a quí, cadaguna que quite las suyas propias conclusions, a aquell expositor que la suya cabeza contiene la obra "Naturaleza Muerta".
Y agora, con o vuestro permiso, voi a seguir soniando. Salut y emparo mutuo!
