ARREDOL | Educación calcula que en iste curso bi habrá 373 ninos y ninas menos en as aulas. O Departamento d’Educación, menau por Dolores Serrat, dió ahiere novedatz cuanto a las plazas que se ufrirán en o curso 2013-2014 en a ciudat de Zaragoza y os suyos arredols. Entre as novedatz, bi ye o zarre de bellas quantas aulas en bellas escuelas. Rosales d’a Canal baixará de 5 a 3, y se zarrará un aula en os colechios Zalfonada, El Espartidero y Octavus, iste zaguer en Utevo.
A noticia plegó en a Comisión de Guarancias d’o proceso d’escolarización a on que son representaus mais y pais, directors, sindicatos, patronal y l’administración. Tamién se i conoixió toda la reordenación educativa que bi habrá en Val d’Espartera y o vico Universidat.
Dende Educación, un d’os motivos que meten t’o zarre d’aulas ye que, seguntes os datos d’o padrón municipal preveyen que bi habrá 373 ninos y ninas menos en as aulas, encara que fa dos semanas, as cifras que feban servir yeran de 140 ninos y ninas menos.
En Val d’Espartera a puyada d’a demanda ha feito que o colechio Val d’Espartera I enample en un aula a suya ufierta y que Val d’Espartera II en tienga tres y enguere a la fin o suyo nuevo edificio. O gubierno antimás ha decidiu que una d’as aulas que calen en o vico d’o sur Zaragozano siga de chestión privada en mans d’as relichiosas d’a congregación d’as Fillas d’a Pasión de Chesucristo y María Dolorosa, conoixidas como Chirmanas Pasionistas. Iste colechio privau catolico, clamau “A nuestra sinyora de Guadalupe” contará con un concierto con o gubierno dende o curso venient.
Dende FAPAR (Federación de Pais y Mais d’Alumnos d’Aragón) han amostrau a suya disconformidat con ista opción. Encara que creyen que “no ye prou a ufierta en o sur de Zaragoza, ubrir un colechio concertau no ye a solución”.
Seguntes fuents d’ista asociación, a Consellería les ha dito que bi ha ideya de “fer-ie un nuevo colechio, encara que no bi ha ni prochecto ni presupuesto”. Tamién han remerau que en o curso pasau ya se zarroron 13 vías y que quasi denguna se recupera en ista anyada escolar.
