ARREDOL | A detención ye relacionada con a d'atra persona en Aranda de Moncayo con 4.000 repuis arqueolochicos en marzo pasau. A Guardia Civil espanyola ha deteniu a una persona que almagazenaba unas 2.000 piezas arqueolochicas de gran valor, supuestament expoliadas de chacimientos aragoneses y territorios mugants, entre os que se podeban trobar parte d’un casco celtiberico, puntas de flechas, lanzas, monedas u obchectos de ceramica. Tot isto ha estau trobau en una ebanistería y dos domicilios a on amás i heba mapas cartograficos de zonas de chacimientos aragoneses.
Ista actuación policial s’ha feito a resultas d’a operación Helmet II, continación d’a operación Helmet I que aconteció en marzo pasau en que un vecín d’Aranda de Moncayo estió deteniu con 4.000 piezas arqueolochicas que supuestament heba culliu de l’antiga ciudat celtiberica d’Arátikos, en a mesma localidat, y que supuestament iba a vender a coleccionistas alemans. Con os datos analizaus en ista operación s’ha efectuau ista nueva detención. A investigación contina ubierta.
Seguntes a lei, ye ilegal buscar repuis arqueolochicos sin contar con autorización, por o que en caso de trobar-se-ne accidentalment, han d’estar entregaus a l’administración.
