Creixer a es marguins no significa estar marguinal

Antes de prencipiar, habrianos de fer una referéncia a lo termen de "cultura"; en parlar de cultura tenemos dos posibilidaz: cultura como constructo identitário sobre lo qual es sujetos van creixendo e como conjunto d'as representacions d'un grupo social concreto...

Ilustración: Rubén Hervás

Antes de prencipiar, habrianos de fer una referéncia a lo termen de "cultura"; en parlar de cultura tenemos dos posibilidaz: cultura como constructo identitário sobre lo qual es sujetos van creixendo e como conjunto d'as representacions d'un grupo social concreto; esta segunda consideracion d'o termen ye la representacion material d'a primera. Aquí imos a fer un mezclallo d'es dos usos pa parlar d'a cultura popular (entendita en lo suyo sentiu més etimologico, como cultura d'es lugars) e cultura academica.

A es manuals, exposicions, museus e demés escenários culturals s'ensinya una cultura (como representacion) dende una envista urbana; entre que es productos feitos a lo mundo rural s'amuestran como bella cosa quasi exotica. Asinas pues, a lo ideário colectivo se canoniza e da per valido la cultura urbana, que pasa a estar la elevata, l'academica e la que cal plasmar en libros pa configurar las identidaz e construir la história.

Esto, que puede pareixer que no tiene conseqüéncias guaire profundas, transciende lo marco d'as representacions materials dau que fomenta que la cultura (entendita como constructo) rural sia denostada e presa como inferior e marguinal.

La cultura rural ye una suma d'experiéncia, d'experimentos d'asayo-error e d'elementos asimilaus d'ambitos cientificos u academicos; ye decir, ye una cultura de sintesis an conviven la experimentacion e la lectura d'o entorno d'una forma particular con elementos "tecnicos" provenients d'o exterior que permiten que la cultura se desenrolle e perviva. Que la forma de vivir e de transmitir esta cultura sia més experimental e no amaneixca a es libros establius per lo canon academico no ye sinonimo de que manca de profundidat.

L'academicismo ye la fuesa pa la diversidat en ignorar representacions que s'alunyan d'o canon; s'ha de promocionar lo mantenimiento e la integracion d'estas atras formas culturals de construccion e transmision d'a identidat; si només se para cuenta d'a cultura que ufreix l'académia se caye en lo simplismo cultural pos se son ignorando culturas que tienen conseqüéncias materials en estar fundamentals per la construccion d'identidaz.

Asinas pues, fer una gollada a es marguins e salir d'o centro d'es sistemas culturals canonizaus per l'académia ye clau pa tener una envista completa e diversa d'as realidaz d'es lugars; pa comprender e acercar-se a estas culturas només cal aprender a valorar tot lo qu'arrodeya lo mundo rural.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR