ARREDOL | Ahiere a las 12.00 horas en o Paraninfo de Zaragoza yera a hora trigada ta empecipiar a manifestación convocada por a Coordinadera Sindical Alternativa formada por os sindicatos Confederación Cheneral d’o Treballo (CGT), Confederación Nacional d’o Treballo (CNT), Sindicato Obrero Aragonés (SOA), Colectivo Asambleario de Treballadors d’Aragón (CATA), Intersindical d’Aragón (IA) y Colectivo Unitario de Treballadors (CUT) con o lema “O 23 d’abril no tenemos cosa a celebrar y nos van a ascuitar“.
A movilización teneba a fin “d’expresar a las autoridatz que os aragoneses y aragonesas tenemos cada vegada menos motivos de celebración” demandando tanto a derogación d’a reforma laboral como d’as retalladas. En a manifestación tamién han participau esferents partius politicos y colectivos socials como Stop Desahucios, o Bloque Independentista de Cuchas u Izquierda Anticapitalista entre atros.
Diversas pancartas entre os esferents sindicatos y colectivos pasaban por o Paseu Pamplona y o Paseu María Agustín dica a plegada en o Palacio de l’Alchafaría. Amán d’unas 1.000 personas i asistioron entre chilos contra as retalladas como “no ye crisi, ye luita de clases”, “se va a rematar a paz social”, “reforma laboral, terrorismo patronal”, chilos a favor d’a independencia y en cheneral contra a familia reyal espanyola, os banquers, interpresaires y os gubiernos espanyol y aragonés.
A manifestación remataba en l’Alchafaría, siede d’as Cortz d’Aragón, a on celebraban conchuntament o Diya d’Aragón os poders lechistativo y executivo aragoneses. As Fuerzas y Cuerpos de Seguridat de l’Estau debiu a ista celebración esbarroron a manifestación enta una chicota carrera antis de plegar en l’Alchafaría, en frent d’a dentrada, en a carrera Castiello a on a Policía no deixó nian salir t’a cera d’a carrera Diputaus a os manifestants, que quedoron “acorralaus” en ista chicota carrera, y debiu a la cantidat de chent que i heba y que no i culliba, muitas personas habioron d’ir-se-ne finalment sin sentir o manifiesto.
Chiflos y chilos prencipioron a sentir-se-ie, mas que mas malas que apareixeba bell diputau salindo d’o palacio. O manifiesto d’o sindicalismo alternativo prencipió a sentir-se por a megafonía, destacando que “no tienen cosa a celebrar” asinas como tampoco a chent en ature u as personas afectadas por ERES y por a reforma laboral. Afirman que somos debant “d’o saqueu d’os recursos d’os pobres t’os ricos“, “fendo servir a crisi ta acotolar os nuestros dreitos socials, laborals y ta fer-se con os servicios publicos“, fendo “complice” a o Gubierno aragonés d’o “saqueu” d’o Gubierno espanyol en “no amparar con una cobertura y un chornal social a totz y todas as aragonesas”.
A Cumbre Social Aragonesa tamién se moviliza
A las 11.00 horas d’o diya d’ahiere a Cumbre Social Aragonesa se concentraba tamién en Zaragoza, en a Pza. d’Espanya con o lema “Por o present y futuro d’Aragón“, criticando tamién l’actual politica de retalladas d’os Gubiernos espanyol y aragonés y en esfensa d’un nuevo modelo social. Ista plataforma en a que destaca a presencia de CHA, CCOO, UGT y atras organizacions vecinals, socials, sindicals y culturals ha arroclau en a concentración a unas 100 personas.
En l’acto s’ha desplegau una gran bandera aragonesa por parte d’as personas presents y s’ha leyiu un comunicau de voz de Mariano Anós, d’o colectivo +Cultura en o que ha destacau que “se ye dando un golpe d’estau silencioso a on os intreses d’o mercau han seqüestrau a democracia. A crisi ye chenerando una breca social desconoixida en Aragón“. Asinas mesmo, refusan “l’intento d’aprofitar a crisi economica ta implantar crudels midas neoliberals que merman a nuestra calidat de vida, empobreixen a nuestra economía, tienden a la centralización estatal y debilitan a las corporacions locals”. A tamás de que “son tiempos dificils”, “continamos creyendo en o nuestro futuro; sabemos que ye o momento d’a voluntat colectiva, de meter en valor o que somos, de fer d’a unidat l’instrumento necesario ta alcanzar un futuro millor y mas chusto t’a ciudadanalla”. Finalment apuestan por “un Aragón a o servicio d’a suya ciudadanalla y no a o d’os mercaus“.
Os participants han marchau enta Plaza Aragón a on se cantó o “Canto a la Libertad” de J.A. Labordeta. Parte d’as personas asistents s’unioron a la manifestación d’a Coordinadera Sindical Alternativa.