Dende iste chueves 23 de chulio dica o día 25, Consello d’a Fabla Aragonesa inaugurará en Uesca una nueva edición (en va 24 ya) d’o congreso de luengas y culturas menazadas que se celebra dende 1965 en diferents puntos d’Europa con luengas en risgo de desaparición.
Consello d’a Fabla Aragonesa ye miembro d’ALCEM (Asociación por as Luengas y Culturas Europeas Menazadas) que en 2012 prenió o relevo d’a AIDLCM (Asociación Internacional por a Defensa d’as Luengas y Culturas Menazadas) que empecipió a realización d’iste congreso.
Seguntes a organización, se conta con fer vistera a la sociedat y autoridatz a situación d’as luengas europeas menazadas asinas como fer vinclos entre os diferents representants y fablants d’istas luengas treballando de conchunta pa privar a desaparición d’as luengas minorizadas. L’aragonés tendrá un puesto especial y se reivindicará accions en a politica lingüistica pa conservar l’idioma.
Iste chueves se ferá a bienvenida d’os congresistas en a Diputación de Uesca, con discurso inicial d’os presidents d’o Consello d’a Fabla Aragonesa y d’ALCEM. Se presentará o informe “El aragonés en el siglo XXI” y se prochectará o documental “Anvistas/Ambistas“.
O viernes 24 en os Porches de Galicia i habrá puesto pa exposición y venda de libros en diferents luengas menazadas en o “Escaparate de las lenguas amenazadas“. “¿Cómo hacer que las lenguas amenazadas sobrevivan?” será o tema d’a conferencia prencipal, seguida d’una mesa redonda sobre experiencias con atras luengas menazadas, o sardo, o vasco y o gaelico escocés. Se ferá una visita guidada por o casco historico de Uesca y i habrá tiempo pa la mosica con un recital en aragonés de Kike Ubieto en Bendita Ruina.
O sabado 25 se ferá una cursa t’o castiello de Lobarre y se presentarán diversas resolucions sobre luengas menazadas, concluindo con l’asambleya cheneral d’ALCEM y una chenta de clausura.
Mas información d’o programa aquí.
Articlo publicado por Arredol.