Comunicau de Fablans Zaragoza

Ligallo de Fablans de Zaragoza fa publico un comunicau en o tocante á las aizions que en zagueras ha desembolicau a Dirección General de Política Lingüística en os zaguers meses y a contestazión de diferens asoziazions arredol d’iste tema.

A lengua aragonesa, dende a fin de o medievo no ha feito que retacular en Aragón. Con tot y con ixo, en o sieglo XXI muitas personas siguen morindo-sen en aragonés. Pensaban en a lengua suya y traduziban á o castellán. Auto reflexo aprendiu pa no parixer más arrezagaus que o suyo vezín. O castellán yera o progreso.

Ligallo de Fablans de Zaragoza, primer asoziazión viva en Zaragoza cuyos sozios enzetón a esfensa de l'aragonés antis de conformar-se como entidat legal, ha siu testigo y actor en o movimiento en esfensa de l'aragonés dende o prenzipie de a democrazia.

Dende que en 1999 Marcelino Iglesias prometese en o suyo discurso d'investidura una lei de lenguas dica iste inte, diversos partius han gobernau con más u menos aziertos. Entendemos que a rezién creyada Dirección General de Política Lingüística tampoco no ha enzertau en tot pero semos consziens que ye difízil treballar tenendo á toda la opinión publica mirando-te dispuesta á creticar.

O movimiento en esfensa de l'aragonés ha trunfau consiguindo que á la fin, o Gubierno d'Aragón empente as lenguas nuestras con a dinnidat que se i merexen, metendo en marcha una Direzión Cheneral con una graniza autividat y con un presupuesto menimo. Sin dembargo, o prozeso pa dezidir a grafía ofizial de l'aragonés ha chenerau un estrapaluzio que consideramos un sin sentiu. Dende que Fablans esiste, a reivindicazión que s'ha feito cutio ye a ofizialidat de l'aragonés y no podemos entender cómo atras asoziazions s'oposan d'una traza tan radigal á las autuazions de a Dirección General de Política Lingüística tornando á enfrontinar á la soziedat cuan parixeba que tot yera (alto u baxo) resuelto.

As personas son libres de discrepar de os politicos y os zientificos pero Ligallo de Fablans de Zaragoza s'adedica á la dinamizazión soziocultural y no ye papel nuestro negoziar con uns ni reñir con otris. Ya dezidiemos fa añadas que feriamos servir a grafía de o 87 mientres que o gubierno no tartise. No porque pensásemos que yera la millor sino por coderenzia. Si esen amanexiu siete grafías más, abriamos iu esnavesando por todas? En a nuestra zaguer asambleya en 2017, antis de a presentazión de l'informe de os tres saputos, ya dezidiemos azeutar as dezisions de a Dirección General de Política Lingüística mientres plegaba l'inte en que, dimpués d'un tiempo de debate y reflexión internos, acatariamos u no pas a grafía imposata por o Gubierno d'Aragón.

As personas y as entidaz, que levamos tanto tiempo treballando por l'aragonés, emos fracasau asaber-las de vezes mirando d'ir á ixena. A grafía u ortografía, siendo muito importán, no dixa d'estar una ferramienta, un amiro de convenzionalismos que sisquiá dan caráuter á una lengua. Iste no ye l'obchetivo. No ye l'inte de trigar culpables pero ye menester espullar-se de os melicozentrismos que sufren personas y entidaz que s'empeñan en abanderar movimientos enteros y fablar en nombre de personas que no representan pas. Ligallo de Fablans de Zaragoza solo fabla que en nombre de os sozios suyos y nunca no ha prebau d'imposar o suyo criterio, mesmo pensando que yera o millor. Bi ha muitas personas que igual lis importa una grafía que atra y muitas tamién que prefieren una grafía que no lis agana que seguir en barallas de sanselos.

Pensando en quienes han manteniu l'aragonés vivo dende o medievo, en nusatros, en os nuestros compañers de luita y en os nuestros fillos, semos seguros que solo que azeutando as dezisions (alto u baxo enzertadas) d'iste gubierno y os venideros será posible que l'aragonés perviva con dinnidat entre toz os aragoneses. Tan i mientres plega l'inte de a dinnidat plena, astí seguirá ista asoziazión cultural cusirando lo gubierno, creticando as suyas errors y proposando soluzions.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies