ARREDOL | Alertan tamién d'os periglos d'os almarios y d'as dificultatz ta charrar sobre sexo en fer-se as prebas.O colectivo SOMOS LGTB+ ha quiesto remerar a importancia de fer-se as prebas d’o VIH (Virus d’inmunodeficiencia humana) arredol d’o diya d’a preba que se celebra o 20 d’octobre. “O diagnostico precoz y o suyo tractamiento aduyan a achiquir a transmisión d’o VIH, poque fer-se a preba diagnostica dimpués d’una practica de risque tien beneficios t’a salut individual y t’a salut publica”, han declarau.
Seguntes os datos d’o Ministerio de Sanidat de 2011, o 54% d’os nuevos diagnosticos de VIH surtioron en hombres que tenioron sexo con atros hombres. Encara que son un d’os colectivos más concienciaus, 1 de cada quatre no se l’han feito nunca y o 66% no se la han feita en a zaguer anyada.
En Aragón, SOMOS LGTB+ ufre un servicio t’a comunidat LGTB de baldes, anonimo y confidencial, d’asesoramiento sobre sexo más seguro, practicas de risque y refirme en caso de diagnostico positivo de VIH. Antimás sirven tamién como vinclo ta centros a on que se puede fer a preba de traza anonima.
Seguntes iste colectivo, nomás o 38% d’os hombres que se facioron a preba no podioron charrar sobre o sexo practicau con atros hombres en l’entorno a on que se facioron a preba, por lo que alertan tamién de que cal treballar contra os “almarios” en o centros d’atención sanitaria. “Cal sacar os prechuicios que continan existindo en a sociedat contra lesbianas, gais, transexuals y bisexuals, tamién por una qüestión de salut. Una choventut sin almarios se troba más empoderada ta demandar una preba diagnostica dimpués d’una practica sexual de risque, sin a medrana de sentir-se chuzgaus”, declaran.
“Se recomienda de fer-se una preba d’o VIH una vegada a l’anyada si tenemos una vida sexual activa, meter-lo en o nuestro calendario igual como ir t’o dentista u as mullers cisexuals t’o chinecologo”, recomiendan dende a FELGTB.