
ARREDOL | A II Trobada de Chiflo y Salterio se planteya como una chornada de trobada ta totz os interesaus en istos dos instrumentos; sigan mosicos, danzantes, alumnos u aficionaus ta la mosica y culturas populars. A trobada se ferá os diyas 23, 24 y 25 de mayo en Lasaosa, chicot nuclio en recuperación d’a Guarguera, aunando en o suyo esprito de revitalización d’os nuestros lugars y d’a nuestra mosica y culturas populars.
Organizada dende Aragón, s’aspera contar con l’asistencia de mosicos de tradicions amanadas, plegaus dende Països Catalans, Occitania u Euskal Herria, a on que ista mena d’instrumentos tienen fundas radices y prou vitalidat.
Ta os mosicos y os alumnos de chiflo y salterio s’han aprestau tallers de iniciación, repertorio aragonés y bearnés, percusión pirinenca y bailes de salterio. Antimás, mientres tot lo diya, bi habrá tallers t’os más chiquetz, una exposición de luthiers, un scenario libre ta qui quiera amostrar a suya mosica, y atras actividatz.
De nueitz, Maut y Bosnerau, zarrarán a programación con as suyas propuestas mosicals a on que se barracha o folk con atros estilos bien innovadors. Ta qui quiera fer-ie nueit, bi ha zona d’acampada libre. Toda la información se puet trobar en http://trobadachifloysalterio.com.



