ARREDOL | Representants de Chunta Aragonesista (CHA) han remerau o compromís d’o president d’a Confederación Hidrografica de l’Ebro (CHE), Xavier de Pedro, comprometendo-es a mirar una solución ta guarenciar que a Cinca mantenese o cabal ecolochico entre Lo Grau y Balbastro permetindo l’actividat acuifera de vez que o desembolique interpresarial y agricola d’a redolada.
Manimenos, seguntes CHA, “ista anyada, y en levamos qualques, a situación que presienta iste trampo ye penible“. Joaquín Palacín, portavoz d’a formación en a Comisión de Meyo Ambient d’as Cortes, ha anunciau que demandará explicacions a lo Conseller Modesto Lobón qui, seguntes Palacín “no cumple con as suyas funcions”. O diputau tamién ha acusau de irresponsabilidat a la CHE de qui diz que una vegada más “contrimuestra que a buena salut d’os nuestros ríos y de l’ecosistema fluvial no les importa ni brenca ni meya”.
“Ye inautido y penible que un río pirinenco como la Cinca presiente ista situación auguas abaixo d’un entibo, por culpa d’una administración que no cusira que se respete lo cabal que cal, t’a recheneración natural y d’o paisache d’o suyo cauz y o suyo posible aprofeitamiento ta emplegos ludicos”, ha declarau Palacín.
D’atra man, Valero Aguayos, portavoz de CHA en o concello de Balbastro, ha quiesto remerar que o suyo partiu consiguió que o concello y a comarca presentasen alegacions t’o Plan de Cuenca demandando “una mayor estimación d’o cabal ecolochico en o trampo presa de Lo Grau dica la desembocadura de l’Esera, que en garra caso habría d’estar por debaixo en o mes de rechimen hidrolochico de 3 m3 /segundo, con l’obchectivo de que a continidat d’o cabal en o trampo que pasa por a comarca de Semontano siga la adeqüada ta cumplir os criterios medioambientals d’a Directiva Marco de l’Audua”. Tamién se i demandaba que “os cabals minimos ecolochicos estasen de obligau cumplir en tot caso, y as reservas hidricas d’os entibos se destinasen de traza preferent y, fueras de necesidatz de boca d’augua, a cumplir os cabals ecolochicos minimos, rai l’alporte natural a l’entibo en cada inte”.
