ARREDOL | As fiestas prestas por l'Asociación Alfonso I "El Batallador" de Calatayut, son declaradas d'Intrés Turistico en Aragón y ya celebran ueito anyadas.
Ista nueit “l’asalto” a o castiello d’Ayub, a las 22.00 horas, marca o prencipio d’as Alfonsadas en Calatayut, que celebran a toma d’a ciudat por Alifonso I “O Batallador” en 1120. Continarán mientres tot o cabo de semana y que levarán a la ciudat ent’a edat medieval. Manimenos ya i ha habiu bellas actividatz previas, como visitas guidadas y conferencias. Ista fiesta ye declarada d’Intrés Turistico en Aragón.
Mientres iste cabo de semana en Calatayut, se i darán cita toda mena de personaches medievals que se trobarán en as diferents actividatz prestas t’a fiesta: mercaus artesanals, representacions teatrals, como “Os chuicos de l’Augua”, a “Capitulación d’a ciudat de Calat’Ayyub” u a entrega d’as claus d’a ciudat por o gubernador almoravide a Alifonso I, conciertos con Wyrdamur y Lurte, pasavillas, haimas, mosica en a carrera, tallers, cuentacuentos y titeres, etc.
En ista edición, o Caballero d’Honor será l’actor Armando del Río, que leyerá o pregón maitín a las 19:30 h. en a balconada de l’Antigo Concello en a Pza. d’o Mercau. Asinas mesmo, será nombrau “Abedín” d’Honor de l’Aljama de Calatayut.
