Dende Cálamo han declarau que "hemos teniu suerte y a lo largo d'os anyos hemos recibiu uns quantos (premios). Te los dan, te felicita a chent que te quiere -tamién qualques autoridatz, atras t'ignoran-, lo celebras, te pillas una buena kurda - con o paso d'o tiempo cada vegada mas suau-, rides un rato y te mercas un marco barato ta penchar o diploma en o forau libre d'a paret. Y dimpués d'uns quantos 'tes' s'acabó a fiesta. O que ye impagable, la qual cosa nunca cal deixar de celebrar ye a amistat, sentir quiesto.Y en amors y amistatz caminamos muit contentos: gracias por os unos y os atros".
O Premio Boixereu Ginesta reconoixe publicament dende 1995 o treballo d'aquellas librerías que realizan una important labor en o fomento y desembolique d'a cultura escrita y que contribuyen a la consolidación d'a cadena d'o libro en os suyos ambitos d'actuación.
Librería Cálamo ye una librería independient de fuerte compromiso cultural fundada en 1983 con dos obchectivos: vender buenos libros, cudiando a selección d'os suyos fondos bibliograficos baixo o solo criterio d'a calidat, y participar de traza activa en a vida social y cultural d'a ciudat de Zaragoza a traviés d'a realización de numerosas actividatz ligadas a o mundo d'o libro y d'a cultura.
A lo largo d'os suyos mas de 30 anyos d'existencia, Cálamo ha recibiu diversas distincions por o suyo treballo y participau en eventos dentro y difuera d'o Estau Espanyol. Recientment ha estau reconoixida con o Sello de Calidat de Librerías que atorga o Ministerio d'Educación, Cultura y Esporte en colaboración con l'Asociación de Cameras d'o Libro d'o Estau Espanyol. Iste ye destinau a protecher a las chicotas librerías y reconoixer a suya importancia en a cadena d'o libro y o suyo papel como achents culturals. Qualques meyos de comunicación la han incluiu tamién en o ranking d'as millors librerías d'o mundo.
Librería Cálamo organiza infinidat d'actos como presentacions de libros, conferencias y debatz, exposicions bibliograficas, conciertos, lecturas publicas, teatro, actividatz ta ninos, cursos d'escritura creativa, tastas y venda de vins. Convoca tamién os Premios Cálamo, que anualment premian libros y autors esleius por os clients. Cálamo ye tamién una interpresa de chestión cultural que elabora y realiza prochectos relacionaus con o mundo d'o libro en os ambitos local, nacional y internacional, de traza especial en Mexico, Colombia y Guinea Ecuatorial. Entre ells, a organización d'as Trobadas Talento Editorial ta l'I hai Festival América y as Trobadas de Librerías y Editorials Independients Iberoamericanas Atra Mirada.
En edicions anteriors d'o Boixereu Ginesta estioron premiadas, as librerías Laie de Barcelona (2015), l'Antonio Machado de Madrit (2014) y a Marcial Pons (2013), con siedes en Madrit y Barcelona (2013). La entrega d'o galardón se realizará en 13 d'octubre en o Museu Nacional d'Art de Catalunya (MNAC) en o marco d'as actividatz de Liber 2016, a feria internacional mas important d'o libro en espanyol.
En o mesmo acto s'entregarán, amás, os Premios Liber a o Fomento d'a Lectura en meyos de comunicación y en bibliotecas ubiertas a o publico a la periodista de Radio Nacional d'Espanya Pepa Fernández qui diriche o magacín de cabo de semana "No ye un día qualsiquiera" y a o Ret de Bibliotecas Municipals d'a provincia de Barcelona, respectivament. Asinasmesmo, tamién se concederá o Premio a la millor adaptación audiovisual d'una obra literaria a la cinta "Un día perfecto", dirichida por Fernando León de Aranoa y basada en a novela "Deixar plever", de Paula Farias. Amás se premiará a l'autor hispanoamericano mas destacau y se homenacheará a un editor por o suya trayectoria en o mundo d'o libro, totz dos pendients de conoixer.
