ARREDOL | O Museu de Zaragoza, o IAACC Pablo Serrano, o Museu de Uesca y o Museu Juan Cabré, fan parte, dende ista semana, d’o prochecto Google Art. Istos quatre centros que chestiona o Gubierno d’Aragón alportan a ista aplicación más de 200 obras d’arte trigadas d’as suyas coleccions y que l’usuario podrá conoixer a traviés d’ista plataforma web en gran resolución.
Google Art ye un prochecto a on que colaboran dica agora institucions de 40 estaus y que permite disfrutar de más de 40.000 obras d’arte con una calidat grafica prou buena, amanando a lo visitant detalles d’as piezas que por un regular quasi no se pueden viyer.
En ista fase piloto, lo departamento d’Educación y Cultura d’o Gubierno, ha adhibiu a ista aplicación meya centena de piezas de cadagún d’os museus. Ista cantidat irá puyando china chana ta fer conoixer o patrimonio que acullen istos museus.
Asinas, l’usuario podrá viyer en alta resolución os pincels de Goya d’as piezas d’o Museu de Zaragoza, os detalles d’a esculturas de Pablo Serrano -IAACC Pablo Serrano-, as scenas biblicas d’o Monesterio de Sixena -Museu de Uesca- u a obra d’os orfebres ibericos d’o Museu Juan Cabré. A mesma aplicación da información relacionada con l’autor d’a pieza y d’a on vien, entre atros datos.
Antimás, as obras son vincladas con Ceres Aragón, a plataforma online a on que se replegan quasi 15.000 fichas de catalogo de 23 museus y coleccions aragonesas, permitindo a l’usueio conseguir información más completa.
