ARREDOL | A historica colla navarra de rock Barricada, ha anunciau que antis de rematar l’anyada deixará os scenarios. O concierto programau t’o venient 9 d’octobre en o Parquing Norte d’a Expo de Zaragoza será un d’os zaguers d’a banda, que rematará a suya carrera en o mitico Anaitasuna de Pamplona o venient 23 de noviembre.
Mientres os 30 anyos que Barricada ha existiu, han feito más de 20 discos y han conseguiu bells discos d’oro y uno de diamante, en haber vendiu más de 1.000.000 de copias mientres a suya carrera. A colla ha esdeveniu, antimás, en a banda sonora de qualques cheneracions y as suyas cantas son conoixidas por tot.
En 2011, Enrique Villarreal “El Drogas”, anunció que deixaba la colla t’adedicar-se a Txarrena, prochecto que o cantaire teneba albandonau dende os 80. Iste martes, Boni, l’atro cantaire historico d’a banda, anunciaba que tamién en marchaba y bells minutos dimpués Alfredo Piedrafita anunciaba a disolución d’a colla.
En o comunicau, Boni esfendió que “Barricada nunca no deixará d’existir porque o rock and roll tien a virtut de no evaporar-se, gracias a la racada imborrable que deixa. Ciento de letras, discos, conciertos remanen en a memoria por aimor u por baralla, anecdotas de toda mena y prou que toda la chent que de una traza u atra ha creyiu y creixiu con Barricada ta bien u ta mal.”
Piedrafita no zarraba, manimenos, a puerta ta que a colla tornase en o futuro: “Confito en que o tiempo solucione os problemas de cadagun y que en bellas anyadas tos/nos trobemos tanto a faltar que podamos tornar a chuntar-nos”. Totz dos han anunciau que treballarán en nuevos prochectos personals.
