ARREDOL | Iste cabo de semana as localidatz de Balbastro y Zaragoza acullirán cadaguna una Borina por l’aragonés, en esfensa d’a luenga aragonesa y como puesto de trobada de fablans y estudiants d’aragonés.
O viernes dende as 21.00 A flama, en a C / Mayor de Zaragoza, acullirá a XVI Borina por l’aragonés, organizada de conchunta por as asociacions Nogara y Fablans, as dos con siede en a ciudat. Una oportunidat “t’achuntar-nos y pasar una nueit a on que l’aragonés será lo más important”, como sinyalan dende a organización. Antimás se i podrá trobar materials relacionaus con l’aragonés como chambretas u libros, informar-se sobre as actividatz que fan as dos asociacions y, prou que sí, minchar a virolla que se i fa u tastar as bieras artesanas que ufreixe A Flama.
A l’atro’l diya, en Balbastro, la tarde esdevendrá una “Borina por l’amostranza de l’aragonés“, prencipiando a las 16.15 en o Palacio de Congresos con a presentación de treballos d’a colla d’iniciación de Purnas Somontano. Dimpués d’a prochección d’o documental Ambistas/Anvistas, feito por O Trango, se ferá una presentación y taste d’o reffresco feito en Aragón FrixenCola, que menará Chorche Paniello. A chornada rematará con a entrega d’os premios Amostranza 2014, y a grabación d’o curtometrache “Yo reconoixco l’aragonés” con a chent que i vaiga. Ta ixo han demandau mientres istas zaguers semanas l’aduya d’a chent ta que se fese fotos con o lema “Yo reconoixco l’aragonés” y las puyasen t’os retes socials.
