ARREDOL | A colla rockera d’o Matarranya, Azero, presentó iste pasau 1 de chinero o video d’a canta que da nombre a o suyo nuevo disco “Made in Teruel”. Iste nuevo treballo, que contina con l’estilo ya cutiano d’a colla de La Codonyera, ha estau posible gracias a la campanya de micromecenazgo que facioron y que leva más de 3.000 euros replegaus. Encara se puede continar fendo alportacions en a web d’o prochecto, con recompensas como o nombre en o CD, chambretas u numers t’o sorteu d’una guitarra.
O video d’a canta s’ha gravau en Auguaviva, en una placha d’o río Alcherez (Bergantes en catalán y castellano) a on que os components d’a colla contoron con a participación de muita chent d’a zona. Entre o publico d’o video se pueden viyer arrienda mensaches contra l’entibo que ye prochectau en a zona y que destruiría ixa parte d’o río, zona de banyo cutiano t’a chent d’a redolada.
A canta ye bien reivindicativa, nombrando quantos problemas d’a redoladas de Teruel. No ye a primer vegada que Azero fa servir scenarios teruelanos t’os suyos videos. L’anterior, “Bajo Cero”, gravó una canta d’o disco “Sigue buscando” en o lugar de Fórnols.
