O venient viernes ye 21 de febrero, Diya Mundial d'a Luenga Materna, y será conmemorau con diferents autos en a redolada d’o Viello Aragón. En Samianigo, o miercols 19, a las 19.00 horas se prroyeutará en o Salón d'autos d'a Comarca d'o Alto Galligo o documental “Camille, o zaguer onso d'os Perineus”, organizau por Rolde o Caxico e Calibo: Fablants de l'Alto Galligo. D'a suya parti os vecins de Sandiniés ferán a la mesma hora una trobada en o Bar a Cochata ta charrar aragonés tensino: Rufierta Tensina.
En Echo a escuela talment se ferá eco de ista chornada conmemorativa, con a lectura publica de cuentos en aragonés cheso. Os autos rematarán en Chaca, o mesmo viernes 21, a las 20.00 horas en o centro asociativo Acicate con a “Charrada d’o Diya d'a Luenga Materna”, auto organizau por l'Asambleya de estudiant d'a Chacetania, l'asociación Charra-me en aragonés e o sendicato estudiantil SEIRA.
O Diya Mundial d'a Luenga Materna estió instituyiu por a UNESCO en l'anyada 2000 ta promover o plurilinsgüismo e a diversidat cultural. Conmemora a masacre de o exercito pakistaní en Dakha -actualment Bangladesh- en 1952, que ubrió fuego indiscriminau devant de una manifestación que cridaba por o dreito de charrar Bengalí. Yera que, encara ubierto o proceso de independencia d'as colonias inglesas de as Indias Orientals, India e Paquistán luitaban de traza terriblement cruenta ta conseguir estaus nacionals homochenios etnicament. Ixa masacre estió eslexida símbolo d'o quedo culturicidio que fan diya con diya os grans estaus nacionals invisibilizando, minorizando e acotolanto as luengas e culturas populars.
