ARREDOL | O Congreso d’os Diputaus ha aprebau hue a reforma d’a Lei sobre Trafico, Circulación de Vehíclos a Motor y Seguridat Vial que introduce diversas modificacions a l’anterior texto legal. Amás, n’i habrá atras en a modificación d’o Reglamento de Circulación que podría estar dispuesto en chunyo. Todas as midas entrarán en vigor en un mes, fueras d’os nuevos limites de velocidat u os sistemas de retención infantil, que serán en vigor en aprebar-se o nuevo reglamento.
Entre as novedatz, qualques limites de velocidat cambean. En bell tramo d’autovías y auopistas podrá puyar a 130 km/h. En carreteras secundarias se’n baixará 10 km/h. En as ciudatz, se creyarán zonas 20 y 30. Os detectors de radars quedan viedaus, como ya en son os inhibidors. A pinyora podría arribar a 200 euros y 3 puntos d’o carnet.
Os ciclistas menors de 16 anyos habrán de portar casco en toda mena de vía, urbana y interurbana. As asociacions ciclistas protestan debiu a que en a modificación d’o reglamento podría quedar obligatorio l’uso de casco a totz os usuarios en as vías urbanas (en as interurbanas ya en ye). Un burguil de concellos arredol de tot o Estau, mesmo gubernaus por o PP, s’ha amostrau en contra d’a obligación d’o casco. Os y as ciclistas podrán circular por baixo os limites de velocidat minima y as suyas bicis no podrán estar immobilizadas siga qual siga a infracción cometida.
Os Sistemas de Retención Infantil habrán d’estar emplegaus por menors por baixo d’1,35 metros d’altaria. Nunca no podrán viachar en os posientos de debant, fueras d’o caso que os posientos de dezaga sigan de tot ocupaus por menors.
No se permite adugar con garra substancia ilegal en l’organismo, fueras d’os casos de prescripción facultativa y terapeutica. Asinas mesmo, se’n puyan as pinyoras por consumo d’alcohol, estando-ne de dica 1.000 euros si se duplica a taxa maxima permitida u si se reincide en o periodo d’un anyo.
O responsable d’atropellos a especies cinecheticas será o conductor fueras de que no i haiga sinyalización que indique animals sueltos u a cleta no siga reparada.
Os vehíclos de residents extranchers habrán d’estar matriculaus en o Estau espanyol, pus no amaneixen actualment en o rechistro de vehíclos. Amás se facilitará l’intercambio d’información entre países d’a UE respective a infraccions de trafico.
Será pinyora perder a carga en a vía causando grau periglo a os atros usuarios. Tamién realizar obras en a vía publica sin autorización u obstaculizar u danyar a vía causa d’as dimensions y masa d’o vehíclo serán obchecto de pinyora.
Antiparte, entre atras midas, s’aumentan os diyas pa realizar o pago voluntario de pinyoras y fer-ne alegacions de 15 a 20 diyas, os achents de trafico podrán pinyorar sin aturar o vehíclo infractor, as grúas tendrán prioridat en fer un servicio d’auxilio en carretera, se podrá restrinchir a circulación de vehíclos en bella vía por motivos ambientals u as luces d’os vehíclos d’emerchencia serán azulas en cuenta d’amariellas.
