Apareixen nuevos movimientos de tierra y mas brecas en as laderas de l’entibo de Yesa

ARREDOL | As asociacions en contra d'o recreiximiento continan alarmando d'os movimientos de tierras y as grieus conseqüencias que podrían tener. Os movimientos de tierras en as laderas de l’entibo de Yesa continan, seguntes han denunciau as asociacions Yesa + No y Río Aragón. Ista vegada, en han apareixiu en o costau dreito, sobre as urbanizacions Lasaitasuna y El Mirador, en a muga superior d’o esbarizamiento que prencipió fa una anyada y que hue contina. As brecas son de más de 100 metros de largaria y 2 metros d’amplo cullindo-ie una persona, como se puet viyer en as fotos que …

Breca en a ladera de Yesa
Breca en a ladera de Yesa
Breca en a ladera de Yesa. Foto: Yesa+No

ARREDOL | As asociacions en contra d'o recreiximiento continan alarmando d'os movimientos de tierras y as grieus conseqüencias que podrían tener.

Os movimientos de tierras en as laderas de l’entibo de Yesa continan, seguntes han denunciau as asociacions Yesa + No y Río Aragón. Ista vegada, en han apareixiu en o costau dreito, sobre as urbanizacions Lasaitasuna y El Mirador, en a muga superior d’o esbarizamiento que prencipió fa una anyada y que hue contina.

As brecas son de más de 100 metros de largaria y 2 metros d’amplo cullindo-ie una persona, como se puet viyer en as fotos que ninvían dende as organizacions d’oposición a lo recreiximiento de l’entibo. L’asociación Yesa + No ha acusau a la CHE y a lo Gubierno de Navarra de “estar chugando con as personas, manipoliando y mentindo, prebando de transmitir una tranquilidat que no ye basada en a realidat”.

“As brecas son recients y no pas antigas, como diz lo Gubierno de Navarra”, dicen dende Yesa + No. “Antimás, en contra d’o que diz a CHE, no son a 1 km d’os grieus eslizamientos d’a ladera dreita ni tampoco no ye un puesto que se ha ubierto qualques vegadas en atros momentos anteriors: son en a carretera nacional por a on que por un regular se transitaba dica que la tallloron dimpués d’o desaloix de febrero (…). Dimpués estió parcheada y en chunio se i viyó a nueva breca”, adhiben.

A CHE podría fer tornar t’as casas suyas ta parti d’a chent que habió de desaloixar con os movimientos d’as laderas que bi habió fa bells pocos meses, “pero pasando a responsabilidat t’o Concello de Yesa”, informa Yesa + No, qui fa servir informes de que a ladera no ye estable agora ni en será nunca, como han anunciau bells cheologos dende fa meses.

Os opositors a lo recreiximiento consideran que o prochecto “se puede considerar ilegal, pues se podió aprebar basando-se en uns informes cheolochicos que han contrimostrau estar entivocaus, como poco”. Por ixo demandan o desembalse, y remeran que ista demanda ye compartida por os concellos de Zangoza, Aibar, Gallipienzo y Gabarderal, antimás de o Parlamento navarro.

“En breus, prencipiará o desembalse forzau por os riegos auguas abaixo y no se ferá con as midas de seguridat que calen ta ista situación, podendo haber-ie grieus conseqüencias, pues l’esbruixallo de Plan d’Emerchencia sería inutil si calese fer una evacuación”, rematan alertando.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies