A Peña Albahaca Reberde celebra iste San Lorién 2026 una edición bien especial. Coincidindo con o suyo deceno aniversario, a penya ha presentau una programación que se desenrolla entre os días 9 y 13 d’agosto y que tornará a emplir Uesca de mosica, cultura popular y actividatz pensadas ta chent de totas as edatz. Tot ixo sin perder l’espíritu con o qual naixió fa diez anyos: l’autochestión, o treballo colectivo y o compromís con unas fiestas ubiertas, respetuosas y aragonesistas.
Como en edicions anteriors, totas as actividatz son posibles gracias a o treballo voluntario d’as socias y a la colaboración d’as personas y entidatz que aduyan o prochecto, un modelo que ha permitiu consolidar una programación propia y accesible a lo largo d’ista primera decada.
Mesa de socias antes de prencipiar as fiestas
A programación ya ye en marcha antes de l'inicio oficial de San Lorién. Dende o día 3 y dica o 8 d’agosto, Albahaca Reberde tien instalada a suya tradicional mesa de socias en os Porches de Galicia, a o costau d’a Diputación.
A mesa permanece ubierta en horario de 11:00 a 13:00 horas y de 19:00 a 21:00 horas, an se puede renovar a cuota, replegar encargos, fer-se socia u conoixer de près o prochecto d’a penya. O día 8, por mor d’a carrera, l’horario de tarde será diferent y se comunicará con antelación a traviés d’as suyas rez socials.
Cabalgata y pasabares ta encetar a programación festiva
Ver esta publicación en Instagram
A participación d’Albahaca Reberde en a tradicional cabalgata d’o 9 d’agosto marcará l’inicio d’uns días d’alcuentro, mosica y celebración. En ista ocasión, a penya desfilará acompannyada por a Charanga Zaborreros. O punto y a hora d’alcuentro antes d’incorporar-se a la cabalgata se comunicarán en os próximos días a traviés d’as suyas rez socials.
Un d’os actos mas asperaus plegará o 10 d’agosto con o ya tradicional pasabares, acompanyau por a charanga El Pincho. A salida será a las 19:00 horas dende a plaza de Santo Domingo y recorrerá diferents establimientos d’a ciudat: Al Fresco, Warhol, Bar Paraíso/Wilson y Woodstock. A convocatoria ye ubierta tanto ta socias como ta simpatizants y ta tota persona que quiera sumar-se.
O Reberde Fest torna ta o parque Universidat
O parque Universidat tornará a estar o centro d’a programación musical d’a penya con una nueva edición d’o Reberde Fest, repartida en dos chornadas consecutivas.
A primera se celebrará o 11 d’agosto, dende as 19:00 horas, con as actuaciones d’Ixeya, Radices y Bosnerau, tres propuestas vinculadas a la mosica aragonesa, a cultura popular y as nuevas trazas d’interpretar as nuestras radices dende o present.
A segunda chornada tendrá puesto o 12 d’agosto, tamién dende as 19:00 horas, con os conciertos de LyFontan y Dedito Finger. Dende Albahaca Reberde destacan que o festival mantiene a suya apuesta por a mosica en directo y por dar visibilidat a prochectos diferents d’os que acostumbran a ocupar os escenarios d’as fiestas.
O boloencierro meterá o punto final
A programación rematará o 13 d’agosto con o tradicional boloencierro, una actividat familiar y ubierta a tota la ciudadanía que recorrerá as carreras d’o casco historico de Uesca.
A salida será a las 18:30 horas dende a carrera Zarandia. Como cada anyo, una gran bola recorrerá o casco ta ofrecer una propuesta festiva y participativa pensada ta personas de totas as edatz.
Ver esta publicación en Instagram
Diez anyos construyindo unatra traza de vivir San Lorién
A edición d’iste anyo tien una significación especial ta Albahaca Reberde, que cumple diez anyos dende a suya creyación. A lo largo d’ista decada, a penya ha impulsau un modelo de fiestas basau en a participación, l’autochestión y a defensa d’a cultura aragonesa, consolidando una programación alternativa que combina mosica, cultura popular y actividatz intercheneracionals.
Dende a penya recuerdan que iste prochecto continúa estando posible gracias a o treballo voluntario d’as suyas socias, a las suyas cuotas y a la colaboración d’as personas y colectivos que l’aduyan. Una labor colectiva que permite mantener una programación propia, accesible y coherent con os valors que han acompannyau a Albahaca Reberde dende os suyos prencipios.
