ARREDOL | O chueves 23 d’octubre pasau, o gubernador d’Alaska, o republicano Sean Parnell, sinyó a lei votada en abril que oficializa 20 luengas autoctonas d’o 49º estau d’os Estaus Unius d’America. Dentro d’ixe país de gran diversidat lingüistica a on l’anglés ye a luenga oficial de facto, Alaska ye agora o segundo estau que da a las luengas indichenas una oficialidat. O primer fue Hawaii, que dio a o hawaiiano a cooficialitat en 1976 dimpués d’un voto popular.
Con tot y con ixo, mientres que en as Islas Hawaii existie una ensinyanza immersiva que ha permitiu d’aumentar significativament o numero de fablants (15.000 actualment, que cal contimparar con o millar de fablants nativos), a reconoixencia oficial d’as 20 luengas autoctonas ye solament simbolica, pus no se preveye garra aplicación concreta d’a lei en a escuela, dentro de l’administración ni dentro d’os medios de comunicación, por eixemplo. Se tracta d’entrada de meter en valor ixas luengas y d’animar a la suya transmisión.
Ye probable que no tienga garra aplicación concreta porque son luengas frachils, en particular as d’o grupo na-dene, mesmo en periglo imminent d’extinción, como a dena’ina y l’han, charraus respectivament por menos de 75 y de 20 personas, y cal saber que una ellas, o eyak, perdió en 2008 o suyo zaguer fablant. As luengas esquimo-aleutas son un poquet mas fuertes, en particular l’inupiaq, que charran encara mas de 8.000 personas, pero con qualques mils de fablants, no se puede pensar tranquilament sobre o futuro.
Cal por tanto aguardar que a reconoixencia simbolica d’ixas luengas en Alaska desemboque a escape en accions practicas y eficaces que empachen a suya desaparición.
