ARREDOL | O Campus de Sant Francho d’a Universidat de Zaragoza yera iste maitín vuedo de tot, fueras de presencia d’os piquetes de organizacions politicas, sindicals y estudiantils que informaban a estudiants y treballadors sobre a vada. Bells pocos alumnos evitaban os piquetes d’as puertas principals blincando as cletas ta dentrar t’o campus ta trobar-se dimpués con atros piquetes en as puertas de cadagun d’os edificios.
A las siet d’o maitín plegaban os primers vaders ta zarrar o Campus. A vada yera tamién convocada t’os estudiants universitarios, tanto por sidicatos, como por organizacions politicas, socials y estudiantils. Dica las 9, hora que prencipian a más gran parti d’as clases, quasi garra persona ha prebau de dentrar-ie. A cosa tampoco no cambiaba guaire a la hora punta, pues yeran pocos os alumnos que prebaban de ir ta clase.
O diya d’antis dende bells meyos s’heba avisau d’a posibilidat de que collas de neonazis prebasen de boicoteyar os piquetes informativos. A la fin, no i son apareixius. A cantidat de vaders concentraus aintro d’a Universidat les ha permitiu bloqueyar tanto as dentradas t’o campus como cadaguna d’as dentradas t’os edificios d’as facultatz.
A facultat de dreito ye estada un d’os puntos calients quan, debant de tres mesachas que quereban dentrar-ie, o rector i ha apareixiu a ubrir-les bell camín. Dimpués de no poder fer-lo, una prebatina de conseguir-lo por atro puesto ha rematau con protestas d’o piquete, bell empandullo con os guardias de seguridat y con parti d’o rectorau marchando entre os faltadas y chilos d’os manifestants que, entre atras cosas, l’han remerau a suya actitut en a suspensión d’a charrada sobre o proceso de paz vasco por presions d’una colla de neonazis.
En l’acceso t’o campus amanau t’a biblioteca María Moliner, tamién s’ha viviu un inte de tensión quan una muller ha feito ir-ie a la policía espanyola ta que tallasen un cerrullo que se i heba meso. A la fin, y dimpués de que bells ueito achents se i estasen bell rato, no bi ha habiu garra atro problema. Tamién o Campus Río Ebro, a on que tienen siede a Escuela d’Incheniería y Arquitectura y a Facultat d’Economía y Interpresa, han teniu os suyos piquetes informativos a la dentrada de cadagún d’os edificios, notando-se prou a vada.
