Arredol | Chueves, horas antes de saber-se o fundimiento d’o barco pleno d’immigrants debant d’a costa de Lampedusa, Frontex fació publico o suyo informe regular sobre a clamada ruta central mediterrania. Frontex ye l’achencia d’a Unión Europea encargada de controlar as buegas exteriors d’a UE, y a ruta central mediterrania ye l’itinerario maritimo d’entrada t’a Unión que pasa por Lampedusa, Sicilia, Calabria, Pulla y Malta. Ye a ruta con mas transito d’immigrantes ilegals.
Seguntes Frontex, dica o mes pasau 31.000 emigrants ilegals heban puesto entrar en Europa por ista vía. Una cifra sorpresiva, que dobla o total de l’anyo anterior, si bien no plega ni en a metat de 2011, quan 64.300 emigrants aconsiguioron l’obchectivo. L’achencia detalla as nacionalidatz prencipals d’istes emigrants, una d’as claus d’o problema. A mayoría yera chent provenient d’Eritrea, Somalia, Siria y mas países en guerra u con conflicto grieu d’o sud d’o Sahara. Fuchitivos.
Os immigrants gosan zarpar dende Libia y o desconcierto que s’ha creyau por o cambeo de rechimen ha feito creixer o transito de personas. Antes muitos s’estaban en Libia mesmo, a on trobaban treballo, un obchectivo muit dificil agora mesmo. As rutas por o desierto, poco controladas, y a poca distancia d’Europa explican porqué amaneixe en Libia chent de puestos tant aleixaus como Siria.
Frontex no da datos de muertos en alta mar, tot y que reconoixe haber participau en 900 operacions de rescate, en as qualas puede haber-ie involucradas unas 50.000 personas. De 2012 no n’i hai garra cifra oficial, pero en 2011 as autoridatz europeas reconoixioron que 1.500 personas heban muerto en o Mediterranio afanando-se en arribar a las costas d’Europa. Os expertos charran de 20.000 muertos dende 1988, pero ye una incognita, ya que muitos naufrachios no plegan a estar nunca conoixius.
