“A revolución u ye somarda u no será”: una anyada de Mullers Y Cordials

ARREDOL | Hue o fanzine Mullers Y Cordials fa o suyo primer cabo d’anyo. ¿Ye ista una gran noticia ta publicar-la en un medio de comunicación? Puet estar que no. Tampoco queremos fer-nos a bamba. Nomás creyemos que as cosas buenas, encara que chicorronas, cal celebrar-las y compartir-las.

mullers y cordials chorche tricasARREDOL | Mullers Y Cordials | Hue o fanzine Mullers Y Cordials fa o suyo primer cabo d’anyo. ¿Ye ista una gran noticia ta publicar-la en un medio de comunicación? Puet estar que no. Tampoco queremos fer-nos a bamba. Nomás creyemos que as cosas buenas, encara que chicorronas, cal celebrar-las y compartir-las.

Estió o 20 de chinero de 2014 quan plegó un correu electronico que deciba bella cosa asinas: “(…) como fa un tiempo que queremos escribir bellas cosetas as mesachas en aragonés, ista ye una “propuesta formal” ta fer un fanzine de chicas de raso en aragonés: debuixos, collages, reflexions, poemas…o que nos faiga goi!”. Dimpués, todas as rispuestas estioron “Sí! Mola! quán nos veyemos (…)” Y asinas prencipió tot… Bueno, no. Como deciba o correu, dende feba tiempos yeranos charrando d’a vergüenya que nos feba en clase charrar en aragonés y de muitas cosas que nos meteban tristas en as nuestras vidas y que amenistabanos compartir de bella traza artistica y con humor, cambiando ixe sentiu que nos feba soltar bella glarima.

Dandaliando, dandaliando, pensemos que fer un fanzine podría estar bien divertiu. Antimás, fer- lo sencillo, como os fanzines que se feban enantis y no una cosa de disenyo, que no sabemos…

Encara que a ideya naixió en chinero, dica o mes de marzo no surtió o primer numer…Ye que caleba pensar en un nombre, contenius, meter un logo que nos fese goi a todas…Somos una colla de amigas, sí, pero as nuestras asambleyas y pleitinas por correu electronico yeran ta viyer- las, entre que somos inseguras y tozolas, yeran ta esmelicar-se-ne…

A la fin trobemos o nombre: “Mullers Y Cordials” (un chuego de parolas entre l’aragonés y o castellán que deixa prou claro que ye feito por mullers, que mesmo se meten furas- y amostramos o dido cordial- que tiernas- “cordiales”) y gracias a Iru (Malavida) tenemos un logo que nos fa a- saber-lo de goi.

A ideya, que encara contina, ye que isto siga un medio ta expresar- nos nusatras. Y de prebar de fer-lo en aragonés, ta que ista polida luenga permaneixca viva y ta continar estudiando y aprendendo- la.

Pero sobretot o fanzine ye una enchaquia. Ta chuntar-nos y prencipiar a charrar de contino. Ta estar criticas con cosas que no nos fan guaire goi (sobre tot de nusatras mesmas), dende a humor somarda. Porque fer isto nos mete contentas. Muito contentas. Prou que sí, de cabo ta quan nos tricolotiamos un poquet porque pensamos d’esferents trazas u porque estar criticas con nusatras mesmas u con cosas que pasan arredol nos puede fer duelo, pero o millor d’isto son os buenos ratetz que pasamos chuntas, o fascal d’ideyas que pasan por o nuestro tozuelo y saber que bi ha muita atra chent que te refirma decindo que s’esmelican con bell escrito, que son aprendendo l’aragonés, que han parau cuenta de bella cosa masclista que no les heba trucau o ficacio u que ninvían más ideyas y proposas.

Sabemos que isto ye un prochecto chicot, que plega a muit poca chent. A nusatras rai! A lo menos hemos creyau un espacio an que mullers venidas d’esferents puestos podemos expresar- nos como nos agana, fendo servir una luenga quasi ixublidada ta muita chent y que china chana ye más present en os espacios publicos a on nos trobamos. Ixo, cal celebrar-lo!

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies