ARREDOL | Como ya ye cada vegada más cutiano, un acto sobre municipalismo en Zaragoza tornó a deixar chiqueta la sala a on que se feba. En ista ocasión o Centro Civico d’a Gara d’o Norte acullió iste mierques un debat ubierto titolau “Cambiar a ciudat ta cambiar o mundo”, organizau por La Pantera Rossa. Bi charroron Maru Díaz, candidata a la secretaría cheneral de Podemos Zaragoza, Tania Sánchez, que se presienta a las primarias de IU t’a presidencia d’a Comunidat de Madrit, y Ada Colau, promotora d’a plataforma Guanyem Barcelona, d’a on que s’han inspirau atras plataformas “Ganemos” por tot l’estau.
En o debat se charró d’os temas más rusients de l’actudalidat politica. Bi estió prou present as politicas de vivienda u urbanismo, prou que sí, pero tamién se debatió sobre a corrupción, l’empoderamiento popular, etc… Como no podeba estar d’atra traza, tamién se compartioron ideyas sobre as millors estratechias ta fer-se con o poder municipal y as trazas de plegar en ixa compleganza que se barrunta entre diferents sectors d’a izquierda y os “movimientos ciudadanistas”.
A charrada yera lo zaguer acto d’unas chornadas que, baixo lo nombre de “Imaginaz“, ha organizau La Pantera Rossa ta “Repensar a ciudat”. Ta qui no podió estar en a charrada, a organización ha puyau l’audio t’o rete y se puede ascuitar en iste vinclo.
