ARREDOL | Iste cabo de semana o comic será l’arte protagonista en Zaragoza, con a celebración d’a XIII edición d’o Salón d’o Comic. Dende o viernes dica o domingo, os puestos d’editorials, botigas, colectivos, fanzines, etc… emplirán a Sala Multiusos de l’Auditorio de Vinyetas y arte grafico.
Antimás d’os expositors, arrienda actividatz s’han programau mientres istos diyas arredol d’o comic y o manga. Sesions de firmas, charradas, presentacions, exposicions, debatz,… y muitas atras cosas completan un programa que se puet consultar en a web d’o salón. Antimás, o salón va espardindo-se y s’han programau actividatz en atros espacios por a ciudat, como o Centro Civico Universidat que acullirá un concierto y un mosical mangaka, u as exposicions que bi habrá en espacios como a Librería Excelsior, El Armadillo Ilustrado u a Galería Carolina Rojo.
Antimas, iste maitin, o salón d’o Comic ha visitau l’Hespital Infantil de Zaragoza, a on que Spiderman y IronMan han feito un taller menau por J.A. Bernal y han recibiu os comics donaus por o colectivo Malavida, Julián Clemente, de Panini Comics, y as botigas zaragozanas Milcomics y Taj Mahal
A entrada, como de cutio, cuesta nomás un euro y permite acceder-ie mientres os tres diyas. Antimás, tamién se regala o “Tebeíco del Salón”, una chiqueta publicación con diferents historietas d’autors y autoras aragoneses.
