
ARREDOL | Philae, un modulo d’investigación dentro d’a nau Rosetta, de l’Achencia Espacial Europea (ESA), ha aterrizau en o cometa 67P/Churyumov-Gerasimenko a 500 millons de kilometros d’a Tierra. L’artefacto tien como misión investigar a superficie d’o cometa con dica diez instrumentos diferents.
Diez anyos ha durau o viache de Philae en o interior d’a nau Rosetta. Rosetta ha arribau a la orbita d’o cometa y dimpués Philae s’ha deixau cayer t’a superficie, una cayida que ha durau siet horas, y ha desplegau as patas pa posar-se-ie. Atamás d’o mal funcionamiento d’os propulsors que aduyaban a posar-se en a superficie a Philae, ha operación s’ha realizau con exito, pues existiba atros sistemas de suchección.
A misión d’o robot será fer fotos d’a superficie d’o cometa y realizar midas y analises sobre a composición d’o cometa, pa investigar sobre os materials organicos que existiban en l’orichen de l’universo, a formación d’o sistema solar y d’a vida en a Tierra. Rosetta s’encargará de ninviar os datos t’a Tierra pa lo suyo estudeo.
A misión de Philae y Rosetta durará dica o cabo de 2015 u inicio de 2016.



