ARREDOL | O Tribunal Constitucional espanyol ha suspendiu a votación d’o 9 de noviembre por unanimidat, pero o gubierno catalán la mantiene. L’ha anunciau o consellero d’a Presidencia, Francesc Homs: "Tot ye presto t’o 9 de noviembre y o gubierno mantiene o proceso participativo. Presentaremos alegacions ta fer entender que ixo que o TC quiere viedar ya no lo femos, dende antes d’o 14 d’octubre. O president ha demandau de reunir o Pacto Nacional por o Dreito a decidir porque cal fer pinya ta abanzar totz chuntos en o exercicio d’o dreito de decidir o futuro politico de Catalunya". Amás, ha anunciau que a Generalitat presentaría una demanda contra o gubierno d’Espanya a o Tribunal Supremo.
He aquí as parolas de Francesc Homs: "O gubierno ye muit tranquilo. Agora cal fer pinya ta esfender totz chuntos dreitos tant fundamentals como o d’a libertat d’expresión. Y por ixo o president ha pediu que se convoque una reunión d’o Pacto Nacional por o Dreito de Decidir". Y ha rematau dicindo: "O gubierno mantiene o proceso participativo con todas as conseqüencias".
Homs ha explicau que a demanda contra o gubierno espanyol yera por haber atentau contra os dreitos fundamentals: o de participación, libertat d’expresión y libertat ideolochica.
Poco antes d’ista comparecencia d’Homs, a vicepresidenta d’o gubierno espanyol, Soraya Sáenz de Santamaría, heba dito que confitaba que o gubierno catalán acataría a suspensión d’o nuevo 9-N. Seguntes Sáenz de Santamaría, ‘a lei obliga a totz y, por tanto, garra gubernante puede decidir qué cumple u deixa de cumplir: a lei ye igual ta totz’.
