
ARREDOL | L’Asociación de Pais d’o Matarranya en Defensa d’o Catalán, Clarió, organiza t’o venient 4 d’octubre una chornada sobre luenga y escuela en o Matarranya, en Penyarroya de Tastavins, con diversas actividatz y charradas ta totz os publicos.
A chornada coincide con un momento d’ataque a l’asignatura de catalán en colechios y institutos como l’IES Matarranya de Val de Robres, a on l’asignatura de luenga catalana s’ufre como optativa chunto a l’asignatura de luenga francesa en 1º, 2º y 3º d’ESO, feito denunciau por a chefa d’o Departamento de Francés de dito instituto. Finalment debiu a la presión d’os pais y mais, o catalán podrá estudiar-se en horario de francés, encara que puede estar que se cambie a horario de tardes, seguntes informa comarquesnord.cat.
A chornada presta por Clarió escomenzará en o centro cultural de Penyarroya con a recepeción y entrega de documentación a os participants de maitins. Se ferá a bienvenida y se presentará o dossier “Benvinguts profess@rs del Matarranya!“. 20 minutos dimpués, Joan Pere Le Bihan, responsable de la Bressola (ret d’escuelas laicas catalanas en a parte catalanofona francesa) dende 1981 dica 2012, impartirña a charrada “O modelo d’immersión de la Bressola“.
Mas ta debant se presentará una serie de tallers didacticos sobre o prochecto d’innovación y investigación educativa “Cantem Junts” y sobre Desideri Lombarte en a exposición “Ataüllar el mon des del Molinar“. Tot rematando se ferá una pausa y se continará con a mesa redonda “Experiencias arredol de 30 anyos d’ensinyanza d’o catalán en Aragón“, que se celebra ista anyada. Tamién i habrá actividatz infantils paralelament a la chornada en a escuela.
De tardes, se ferá actividatz ta zarrar l’anyo Desideri Lombarte. Se realizará una visita t’o Museu Etnolochico Lo Masmut y t’o Parque Aragonés d’a Vivienda, en l’itinerario poetico Desideri Lombarte. Se ferá un mural en a escuela y se realizará a clausura de l’anyo Desideri Lombarte con a lectura d’as actividatz realizadas a cargo de l’Asociación Cultural d’o Matarranya.



