ARREDOL | O pasau domingo a Coordinadera por a Reobridura d’o Ferrocarril Canfranc-Oloron (Crefco) reivindicó, con o refirme d’unas mil personas en a estación de Canfranc, a reobridura d’a linia internacional, zarrada dende 1970 por l’accident d’o puent de l’Estanguet, sobre o río Aspe en Occitania, y que podría reubrir-se en 2020.
Representants de partius politicos, sindicatos y d’atras organizacions yeran entre os asistents refirmando a reobridura en iste acto en que intervinioron l’alcalde de Canfranc, Fernando Sánchez, asinas como o representant de Crefco, Diego Colás, y o representant de Creloc (organización homologa francesa de Crefco) François Rebillard.
Rebilliard considera que cal presionar a o gubierno francés pa que invierta en os 25 km. que quedará pa apanyar a linia entre Bedous y Canfranc. Por a suya parte, Diego Colás afirma que o gubierno espanyol “be de fer una inversión fuerte” en a linia entre Uesca y Canfranc, que sufre d’un gran deterioro pa negociar con o executivo francés a reobridura d’a linia internacional.
L’acto contó con a-saber-la mas asistencia que no atras anyadas. Seguntes o portavoz de Crefco, Diego Colás, isto contrimostra que “a reivindicación ye viva“. Asinas mesmo, considera que o recient zarre d’o Somport u o Portalet en a zona francesa ha feito que se charre prou d’o Canfranc.
Dimpués d’as intervencions, se cantó “Aqueras montanyas”, en occitano y en aragonés. Dimpués se i colocó un sinyal de fusta con os nombres de qualques capitals europeas simbolizando que a linia ye internacional y connecta con a resta d’Europa. A mosica biarnesa y aragonesa de Chrestian Josuér y “La quinta del sordo” en a carpa municipal rematoron o día de reivindicación, antes de regresar en o canfranero d’a tarde.
