ARREDOL | L’acto aculló una presentación d’a EcoRedAragón y de bells d’os suyos integrants (collas de consumo, productors, etc…), una charrada sobre a moneda social, mercau agroecolochico con asabelos productors tanto de vechetals, como d’embutius y mesmo cosmeticos, chuegos cooperativos, una chenta vechetariana y ecolochica d’a man d’as mais y pais d’o centro d’educación libre La Escueleta de Uesca, reunións d’as diferents collas de treballo (como por ixemplo a de comedors escolars que se mira d’empentar o consumo de productos amanaus y sanos a los escolanos, a de certificación participativa que pretende que os consumidors doten d’una valura especial a aquellos productors que treballen de traza sostenible, sana y amanada) y contino se celebró una asambleya cheneral an que se metió en común tot lo charrau en as diferents collas de treballo.
De nueitz a trobada estió amenizada con una ronda por o lugar con Os Gaiters de Tierra Plana, un bingo mosical con Jaime, Akuma Makele metió los ritmos africanos y contino actuón Os Zeltaires. As collas punk Purga y Deshonorantes estión os encargaus de trancar una intensa chornada.
A organización agradeixió a gran participación de chent que i fuó dende tot Aragón (Alcanyiz, Aineto, Graus, Zaragoza…) ya que bi heba apuntadas más de 150 personas pero se calcula que a lo largo d’o diya se i pasón más de 500 personas por as diferents actividatz organizadas. Como parti negativa dicen “se trobó a faltar l’asistencia de más collas de consumo”.
Os asistents destacón “a buena organización, as ganas d’as personas que bi acudión ta continar enantando y o buen ambient” y asperan con ganas a venient trobada que se ferá a l’atro’l anyo segurament en Zaragoza.
A EcoRedAragón ye una iniciativa surtida da primer trobada de Collas de Consumo de productos ecolochicos mientras a III Feria de Trueque de Penyaflor de Galligo (Zaragoza).
Pretende creyar vínclos d’unión entre consumidors y productors ecolochicos en a nuestra tierra con l’obchectivo d’amillorar a nuestra relación y facilitar a totz o consumo de productos respectuosos con a naturaleza y a salut. Ye ubierta a toda la chent intresada.
