ARREDOL | O consello superior de Crimea, o parlamento, ha aprebau hue una declaración d’independencia d’a dica agora republica autonoma ucrainesa. A resolución ha entrau en vigor decamín que ha estau aprebada, con o voto favorable de 78 d’os 100 diputaus, y ha reiterau a voluntat d’adherir-se a la Federación Rusa. Iste ye o trango previo que as institucions en Crimea fan a la incorporación en Rusia, que se sozmeterá a votación en referendum iste domingo y que se preveye que tienga un resultau clarament favorable.
"Crimea, como estau independient, se dirichirá a la Federación Rusa dimpués d’o referendum ta proposar-le a integración en Rusia en calidat de sucheto federau", ha dito hue un portavoz parlamentario.
A resolución aprebada por o parlamento de Crimea menciona o precedent de Kosovo ta chustificar a decisión presa unilateralment. A decisión ‘ha preso en consideración a confirmación d’o tribunal internacional d’a ONU en relación a Kosovo, o 22 de chuliol de 2010, sobre o feito que a declaración unilateral d’independencia d’una parte d’un estau no viola as normas d’o dreito internacional‘.
Seguntes l’achencia ITAR-TASS, o texto diz: "Si os residents en Crimea votan por l’adhesión de Crimea y Sevastopol en Rusia como entidat constituyent, Crimea será declarada una republica independient dimpués d’o referendum. Basando-se en os resultaus d’o referendum, Crimea se dirichirá a Rusia ta adherir-se como entidat constituyent". Y adhibe que Crimea será un estau democratico, secular y multinacional.
O gubierno ucrainiano ha declarau ilegal o referendum en Crimea d’o domingo.
