ARREDOL | A Fiscalía de l’Audiencia de Teruel prencipiará a investigar a posibilidat de que bi haiga habiu un delito de prevaricación en o reparto d’os 60 millons d’euros en o Fundos d’Inversions de Teruel (FITE) d’o 2012. A investigación prencipia dimpués de que a formación politica Compromiso con Aragón (CcA) denunciase que istos fundos se repartiban “a la carta de bells pocos concellos” y demandase que s’establixesen “unas bases obchectivas y transparents aintro d’o marco d’a legalidat que regulen a distribución d’istos diners que pagamos d’entre totz os ciudadans”.
Decinueu lugars de Teruel no han recibiu ni un euro en as zaguers cinco anyadas. Entre ells Andorra, gubernada por IU. Os fundos se reparten sin reglas conoixidas en un alcuerdo a tres bandas: PP y PAR, con o refirme d’o PSOE”, diz o president de Compromiso por Aragón, Joaquín Moreno.
Ta Moreno, iste reparto ye “fosco y inchusto porque suposa una falta de respeto más a los lugars d’o territorio, creyando municipios de primer y segunda categoría, uns con dreito a recibir subvencions y atros sin garra dreito a recibir cosa”.
O conseller d’Economía, Francisco Bono, a qui CcA fa responsable d’istas irregularidatz s’ha esfendiu explicando que o reparto d’os fundos los leva una comisión mixta d’os gubiernos aragonés y espanyol, que “actua con criterios fiscalizaus d’antis por a Intervención Cheneral de l’Estau y d’a comunidat autonoma”. A tamás d’ixo, declaró estar “de tot convenciu de que no bi ha habiu garra irregularidat”.
