ARREDOL | A tronada deixa un muro esvoldregau y afeccions en hortals, locals y viviendas. A localidat baixo aragonesa d’Andorra ha sufriu a tardi d’iste martes una impresionant pedregada que ha deixau quantos desperfectos por tot o lugar y ha ixorrontau a los habitadors. Muitos d’ells declaraban no haber visto cosa parellana en a suya vida.
A las siet d’a tardi a plevia feba acubillar-se a los andorranos en portals y bars, esdevenindo a escape en una tronada y pedregada que l’alcantarillau no adubiba a replegar. As carreras s’han empliu d’augua, fendo-se arrigachuelos por tot lo lugar, como en a centrica Plaza d’o Regallo, a on que o río Regallo, entibau por debaixo d’o lugar, se saliba.
Bells comercios y locals han resultau afectaus en dentrar-ie l’augua y mesmo s’ha esvoldregau un muro. Os servicios de protección civil han habiu tamién de sacar augua de bella casa. A piedra cayida ya ha prencipiau a replegar-se, con l’aduya de bells vecins, ta poder tornar antis con antis t’a normalidat. A plevia tamién ha afectau a atros lugars como Alcorisa u La Mata de Los Olmos y ta hortals de toda la redolada.
